العودة   منتديات الدولى > المنتديات الإسلامية > المنتدى الإسلامى العام

المنتدى الإسلامى العام كل ما يخص الدين الإسلامي من عقيدة وسنن وقرآن وأحاديث شريفة وأدعية إسلامية وكل أحكام الشريعة


1 
غصن الربيع




المحاضرة 10 : قصة أصحاب الكهف 2


بسم الله الرحمن الرحيم


احنا المحاضرة اللى فاتت اتكلمنا عن اصحاب الكهف ، وقولنا ان الفتية آمنوا بربهم وقالوا عشان يوصلوا للناس ويخلوهم يؤمنوا بربهم لازم يساعدوهم الأول ، فبدأوا يساعدعوهم وبدأ الناس يحبوهم ولسه خلاص هيقولوا للناس لا إله إلا الله ، جواسيس الملك عرفوا انهم موحدين بالله

فقام الفتية هربوا وراحوا استخبوا فى الكهف

طيب حصل إيه بعد كدا :


عايزكم تركزوا كويس جدا النهاردة لأن النهاردة يوم غير عادى ، قصة اهل الكهف هى قصة التوكل على الله شوية شباب توكلوا على الله فربنا غير ليهم نواميس الكون والعالم من حولهم

فربنا دبرلهم امرهم وحفظهم وييسر امورهماختفى الفتية فى الكهف

طب الكهف دا عبارة عن إيه وايه تصميمه :


اولا الكهف مساحته 90 متر والكهف متصمم تصميم ربانى عجيب ازاى ؟


يعنى لو قلتلكم مكان مكيف جدا جدا جدا جوا الجبل فانتا لو دخلت الجبل تلاقى حجرة الإستقبال وبعدين الحجرة اللى ناموا فيها وراهم وبعدين مكان يدخل منه الهواء من فتحة يدخل منها ويدخل منه الشمس كمان وبكمية محدودة عشان لو الجو بارد يمر فى السرداب اللى يوصل ليهم الهواء مش بارد ، ولو الجو حار يمر من خلال السرداب رطب وكويس ، وتدخل اشعة الشمس جوا الكهف وبكمية محدودة جدا عشان ربنا يحافظ على اجسادهم لمدة 309 سنة

وجسمهم مش يتعفن

فالكهف متصمم بطريقة متجيش فى وش الشمس فالفتحة بتاعت الكهف جنوب شرق

لكن وهى بتغرب تدخل اشعة الشمس لكن بكمية قليلة واشعة لطيفة ( سبحان الله )
فالكهف دا اتصمم 90 متر ربانى من عند الله من يوم خلق السموات والأرض عشان لحظة دخول الفتية جوا الكهف والفترة اللى هيكونوا جواه ( شايفين الوكيل بيعمل معاهم إيه )
هيألهم الشمس والقمر والهوا والحرارة والبرودة ، عشان يحافظ عليهم وعلى اجسادهم لمدة 309 سنة بنسب معينة

تقول الأية :


وَتَرَى الشَّمْسَ إِذَا طَلَعَتْ تَزَاوَرُ عَنْ كَهْفِهِمْ ذَاتَ الْيَمِينِ وَإِذَا غَرَبَتْ تَقْرِضُهُمْ ذَاتَ الشِّمَالِ وَهُمْ فِي فَجْوَةٍ مِنْهُ ذَلِكَ مِنْ آَيَاتِ اللَّهِ مَنْ يَهْدِ اللَّهُ فَهُوَ الْمُهْتَدِ وَمَنْ يُضْلِلْ فَلَنْ تَجِدَ لَهُ وَلِيًّا مُرْشِدًا (17)


فربنا أمر الشمس والقمر والهوا بأن تحافظ على الكهف وعلى من فيه وأمر العقارب والثعابين الموجودة فى الكهف بالا تدخل الكهف لمدة 309 سنة فكان رحمة ربنا بيهم أنه سخر كل العوامل لحمايتهم ( سبحان الله ) يا جماعة اسم الله الوكيل لازم يتحقق هوا الوكيل توكلوا عليه


طب ربنا عمل إيه ؟


ان الشباب بدأوا مسيرة الإصلاح وعمل الخير وتعبوا شوية فى الأول فراحوا الكهف فربنا قالوهم تريحوا شوية دلوقتى وانتم هتفوقوا الناس بنومكم احسن مما كنتم صاحيين ، لأن اختفائكم واللى عمله فيكم الملك هيخلى البلد كلها تفوق ويقولوا إيه الناس العظام دول ، فتبدأ البلد تتعلق بيهم فتبدأ تمشى على طريقهم فكان نومهم افيد للرسالة من صحيانهم ، وغير كدا جوا الكهف دا فى فجوة كأن المنطقة دى لمزيد من حفظ الحرارة والبرودة بدرجات مناسبة مختلفة عن بقية الكهف


( ادخلوا على الجروب دلوقتى هوريكم صور للكهف من جوا شوفتوا يا جماعة الصور دا صور للكهف من جوا )


تقول الأية :


وَتَحْسَبُهُمْ أَيْقَاظًا وَهُمْ رُقُودٌ وَنُقَلِّبُهُمْ ذَاتَ الْيَمِينِ وَذَاتَ الشِّمَالِ وَكَلْبُهُمْ بَاسِطٌ ذِرَاعَيْهِ بِالْوَصِيدِ لَوِ اطَّلَعْتَ عَلَيْهِمْ لَوَلَّيْتَ مِنْهُمْ فِرَارًا وَلَمُلِئْتَ مِنْهُمْ رُعْبًا (18)


وكان نوم الفتية دول فى الكهف دا لمدة 309 سنة أية من ايات ربنا عشان ربنا يورينا معجزاته

وبعد 309 سنة هيصحيهم المهم ربنا نيمهم 309 سنة وبعدين هيصحيهم عشان يوريهم الدنيا اتغيرت ازاى من حواليكم لما هما تعبوا واشتغلوا للرسالة

طب حصل إيه بعد كدا ؟


جواسيس الملك توقعوا ان الفتية دول مختبأين فى الكهف فقالوا لدقيانوس

فقال لهم : عشان الناس تنساهم وعشان يتخنقوا ويموتوا روحوا وسدوا باب الكهف بحجارة
وسبحان الله ربنا خلى دقيانوس يأمر الحراس بكدا عشان الفتية يناموا الفترة الطويلة دى من غير ما حد يقلقهم ولا يزعجهم من النوم ، فيروح الجنود ويحطوا الحجارة على باب الكهف
وهما مش عارفين ان فى فتحة موجودة اعلى الكهف ودا السرداب اللى بيدخل منه الهوا والشمس ( سبحان الله الوكيل توكلوا عليه يا جماعة وهتشوفوا هوا هيعمل معاكم إيه )
طب ازاى هما هيخرجوا دا الكهف مسدود هقولكم بعد شوية

المهم تقول الأية :وكلبهم باسط ذراعيه بالوصيد


إيه الوصيد دا :


دا سلمة على باب الكهف وكان الكلب نايم هناك عشان لو حد يقرب من الكهف ويشوف الكلب يجرى ويبعد ، كأن كل شئ معد من عند الله الوكيل عشان الفتية يناموا من غير قلق

وهدوء لمدة 309 سنة

وبعدين الاية بتقول : ونقلبهم ذات اليمين وذات الشمال


على فكرة الأية دى معجزة من الله ؟


طب ازاى :


علميا الواحد بيتقلب 30 مرة لا إراديا فى الليلة الواحدة لأن الهيكل العظيمى بيضغط على العضلات ، والعضلات بتضغط على الأوردة فبتحس بألم عشان كدا الواحد بيتقلب وهوا نايم لا إراداى عشان مش يحس بألم ، طب لو الواحد نام على جنب واحد هيحصل إيه ؟


بعد شوية هتجيلوا حاجة اسمها قرحة السرير على فكرة الكلام دا علمى إيه قرحة السرير دا

يبدأ ييجى تمزق فى العضلات واللحم يتمزق وهى مرض شديد ، دا لو نمت على طول على جنب واحد فلو الواحد مثلا فاقد الوعى فى مستشفى كل شوية الممرضين بيدخلوا يقلبوه عشان مش يجيلوا المرض دا

طب اصحاب الكهف نايمين :


فربنا كان بيقلبهم وهما نايمين على اليمين وعلى الشمال عشان مش يجيلهم المرض دا

سبحان الله

شايفين الإعجاز عامل إزاى ؟


فربنا بيقلبهم عشان مش يجيلهم تمزق فى العضلات واللحم ودا مش يوم ولا اتنين دا 309 سنة ، شايفين حنان ربنا عليهم وهما نايمين ، طب احنا بنتقلب فى الليلة 30 مرة - طب ربنا قلبهم بقى كام مرة فى 309 سنة

( يا جماعة اللى يعيش لربنا ويعيش لرسالة ربنا يقف جنبه قوى ، واللى يعيش يحبب الناس فى ربنا هيشوف ربنا هيعمل معاه إيه ، واللى يبقى مع ربنا يتخاف منه دا لو كان مع ربنا حقا
وإيمانا )

طب ايه اللى بيحصل :


الملك والجنود قالبين الدنيا على الشباب ومش عارفين يعملوا إيه ، والملك هيتجنن من الغضب

دا اللى حصل جوا الكهف

طب إيه اللى حصل برا الكهف ؟


دور اهل الشباب عليهم وكلهم كانوا شاكين فى الملك انه عمل حاجة فى الشباب وانه خلص عليهم والملك من اليوم دا بقى عنده نقطة ضعف واهتز لأن البلد كلها بتشك فيه وتنظر إليه انه قاتل الشباب وهم عندهم 15 سنة ، على فكرة الناس مكنتش تعرف انهم آمنوا غير لما الملك صاح قال انهم أمنوا فقال الملك انهم مؤمنين ، فالناس عرفت الإيمان عن طريق الملك من غير ما يقصد فالملك عرف الناس بـ لا إله إلا الله من غير ما ياخد باله لأنه كان بيبحث عن الفتية

فقال الناس : هما دول اللى كانوا بيساعدونا وبيعملوا معانا الخير وكانوا عايزين يعرفونا الإيمان
والتوحيد

طب حصل إيه بعد كدا :


تقول الأية :


أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آَيَاتِنَا عَجَبًا (9)


إيه الرقيم دا وايه علاقته بالشباب :


لما الناس شافت اللى عمله الشباب حبيتهم جدا فقاموا خلدوهم بأن كتبوا اساميهم على لوح خشبى او لوح نحاسى اللى بتتحفر عليه الأسماء يسمى بالرقيم ، فالناس خلدت اساميهم على الرقيم ، عشان تفضل ذكراهم خالدة للأجيال على مر الزمان فطريقة اختفاء الولاد المثير خلى اهل البلد كلهم يتعلقوا بيهم ويخلدوا ذكراهم أنهم كانوا بيعرفونا بربنا وبيعملوا لينا الخير

واصبحت الناس بتتداول الرقيم وبدأت الأجيال تتعلق بيهم وتعرفهم حتى الان وإلى يوم القيامة

طب إيه حصل تانى برا الكهف ؟


بدأت سلطة دقيانوس تضعف وتهتز امام الناس وجنوده وبعد شوية مات دقيانوس الظالم

وجاء ابنه واحس ان الكبت لم ينفع فبدأ ينشر العدل شوية شوية وبدأت الناس تتنفس الحرية
واصبح الرقيم والشباب السبعة واختفائهم المثير هو الوقود اللى بيحرك الناس ، وبدأت الناس تقول لأولادها عايزينكم تطلعوا زى الشباب دى وتموت اجيال وتيجى اجيال وهم متعلقين بالشباب دى فى حين ان الشباب فى الكهف نايمين وثوابهم شغال وبعدين تمر الأيام والسنين وييجى بعد 300 سنة ملك جديد يؤمن بالمسيحية ويؤمن البلد كله ويطلع الرقيم ويصبح هذا اليوم يوم عيد ورمز للبلد كلها

وفى الوقت دا ربنا صلح الدنيا خلاص اصحوا بقى يا اصحاب الكهف وربنا صحاهم عشان تعرفوا

الناس ان ربنا لا يضيع اجر من احسن عملا انا قلت ان دقيانوس قفل الكهف بالحجارة صح ؟

طب الشباب خلاص صحيوا طب هما هيخرجوا ازاى يحصل إيه ، من ترتيب ربنا ان فى صاحب مزرعة جنب الكهف كان عايز يبنى سور فييجى وياخذ الحجر الموجود على باب الكهف عشان يبنى سور مزرعته فيفتح ليهم الكهف

شايفين يا جماعة :

مين اللى متحكم فى الكون ومين اللى يقدر يقول للحاجة كن فيكون ، بالله عليكم بعد القصة دى خلى عندكم اسم الوكيل غالى قوى عندكم وبعدين يفتح باب الكهف وتبدأ الضوضاء ويبدأ الشباب يصحوا والكلب يصحى وكلهم خلاص صحيوا عشان يشوفوا المعجزة ويشوفوا الإصلاح


تقول الأية :


وَكَذَلِكَ بَعَثْنَاهُمْ لِيَتَسَاءَلُوا بَيْنَهُمْ قَالَ قَائِلٌ مِنْهُمْ كَمْ لَبِثْتُمْ قَالُوا لَبِثْنَا يَوْمًا أَوْ بَعْضَ يَوْمٍ قَالُوا رَبُّكُمْ أَعْلَمُ بِمَا لَبِثْتُمْ فَابْعَثُوا أَحَدَكُمْ بِوَرِقِكُمْ هَذِهِ إِلَى الْمَدِينَةِ فَلْيَنْظُرْ أَيُّهَا أَزْكَى طَعَامًا فَلْيَأْتِكُمْ بِرِزْقٍ مِنْهُ وَلْيَتَلَطَّفْ وَلَا يُشْعِرَنَّ بِكُمْ أَحَدًا (19) إِنَّهُمْ إِنْ يَظْهَرُوا عَلَيْكُمْ يَرْجُمُوكُمْ أَوْ يُعِيدُوكُمْ فِي مِلَّتِهِمْ وَلَنْ تُفْلِحُوا إِذًا أَبَدًا (20)



فصحى الشباب وسألوا انفسهم هما ناموا قد إيه ، فقالوا ممكن يوم او نص يوم شكلها نمنا كتير ، بس مش نعرف ربنا هوا العالم فلما صحيوا قاموا جعانين فبعثوا واحد منهم بالفلوس اللى معاهم عشان يجيبلهم طعام جميل ومش يتعامل بعنف مع الناس ويتعامل معاهم بلطف

ومحدش يحس بيك عشان جواسيس الملك فى كل مكان

فنزل واحد منهم فلقى الدنيا شكلها متغير خالص ومستغرب من كل اللى جواليه ، وهوا نازل ساكت فاكر ان جواسيس الملك فى كل مكان وبتدور عليهم حتى وصل إلى بائع وطلع العملة

وقال له : اعطنى طعام
فالرجل نظر للنقود فوجد مكتوب عليها دقيانوس من 300 سنة فافتكر البائع انه وقع على كنز
وقال للشاب : يا إما تقولى مكان الكنز يا إما هبلغ عنك انتا جبت الفلوس دى منين
فقال الشاب له : انها معى وانا هربان من دقيانوس

فضحك الرجل وجمع الناس عليه وكل ما حد يسمع كلام الشاب يضحك

وهوا يقول : ارجوكم لا تجمعوا عليا الناس احسن جنود دقيانوس يمسكونى
وفى وسط الموضع دا يقول لهم : احنا شباب موحدين بالله والناس كلها بقت موحدة بالله
وفى وسط ذلك كان فى واحد من العلماء راح وقاله :ما اسمك
فقال له : اسمى كذا
فقال العالم وقوفوا الضحك محدش يضحك هاتوا الرقيم ، وقال للشاب ما اسماء اصحابك
فبدأ الشاب يقول اسماء اصحابه فأمن الناس اكتر وعلى ثقة ويقين اكتر ، وذهبت الناس كلها إلى الكهف عشان يروا اصحاب الكهف تخيلوا لحظة معرفتهم بالحقيقة عاملة إزاى وانهم شافوا المعجزة قادم عنيهم

تقول الأية :


وَكَذَلِكَ أَعْثَرْنَا عَلَيْهِمْ لِيَعْلَمُوا أَنَّ وَعْدَ اللَّهِ حَقٌّ وَأَنَّ السَّاعَةَ لَا رَيْبَ فِيهَا إِذْ يَتَنَازَعُونَ بَيْنَهُمْ أَمْرَهُمْ فَقَالُوا ابْنُوا عَلَيْهِمْ بُنْيَانًا رَبُّهُمْ أَعْلَمُ بِهِمْ قَالَ الَّذِينَ غَلَبُوا عَلَى أَمْرِهِمْ لَنَتَّخِذَنَّ عَلَيْهِمْ مَسْجِدًا (21)


ربنا خلى الناس تعثر عليهم عشان يعلموا ان وعد الله حق وان اللى نيمهم 309 سنة واحياهم

بيورينا ربنا ان احنا لما هنموت هنصحى تانى يوم القيامة وكله هييجى يوم القيامة وهيقابل ربنا يوم القيامة

قصة اهل الكهف يا جماعة قصة يعلمها العالم كله ويعرفها كل الأديان كأن ربنا بيقول لنا

بالرغم من اختلاف ثقافتكم واديانكم بس فى قصة كلكم هتتفقوا عليها القصة بتقول ان ربنا بيبعث الموتى ، فسورة الكهف مهدت ليوم اليقامة للناس لأنها اتكلمت عن البعث بعد الموت
والأيات بتاعتها موجودة بعد نهاية القصة على طول ايات البعث

اخر حاجة حصل إيه :


اهل الكهف رجعوا للكهف تانى بعد ما الناس عرفتهم ومات اصحاب الكهف فى الكهف جوا الكهف وهما مدفونين هناك جوا الكهف


طب ليه يارب ماتوا :


لأن هما من القرن الاول وصحيوا لقوا نفسهم فى القرن الرابع فمش هيقدروا انهم يعيشوا فى زمن مش زمنهم لكن صحيانهم عشان معجزة من عند ربنا فهما دلوقتى اصبحوا ذكريات وموتهم دا رحمة ليهم وربنا صحاهم عشان يشوفوا المعجزة ويشوفوا الإصلاح فى البلد ونعرف ان يوم القيامة حق ومات اهل الكهف وهما الان موجودين داخل الكهف وقبورهم هناك


هى دى قصة اهل الكهف اتمنى انى اكون قدرت اوصلها على قدر الإمكان




2 
حنين المشاااعر



Powered by vBulletin® Copyright ©2000 - 2018, Jelsoft Enterprises Ltd.
Search Engine Optimization by vBSEO ©2011, Crawlability, Inc.
جميع الحقوق محفوظة لموقع ومنتديات الدولي ElDwly.com
جميع المواد المنشورة بمنتديات الدولي تُعبر عن وجهة نظر كاتبها فقط.