العودة   منتديات الدولى > المنتديات الأدبية > منتدى الشعر والقصائد

منتدى الشعر والقصائد القصائد النبطية والعربية الفصحى وكل ما يعنى بالشعر الحديث والقديم، أحدث قصائد رومانسية جديدة 2017


1 
عـز الرجال


احبتي أعضاء الدولي المحترمين
اخترت لكم اليوم مجموعة رائعة
من قصائد الشاعرة المصرية المبدعة
إيمان بكري
حزب الوز ... وحزب الهز ... وحزب الطز
وأعتقد بأن من يقرأها
سـيستمتع جـداً بها
فلنبـدأ من فضلكم:

حزب الوز
وحزب الهز
وحزب الطز
لما نقول ع اللص شِــريف
عبده تلوث يبقي نضيف
وأما الحيلة يقول وانا مالي
عاوز اكوش ع اللي ف بالي
واللي سارقنا نقوله يا غالي
يبقي نسمي الوضع دا إيه؟؟؟

طيب لما تحس انك مزنوق
عايش جوا وطن مسروق
ولا عافية بتنفع ولا ذوق
قولي جنابك تعمل إيه؟؟؟

و أما تلاقي جيوبك فاضيه
أو مهزوم بالضربه القاضيه
وبيدوروا ع الحته الفاضيه
حتخبيها ازاي و بإيه؟؟؟

انا راح اقولك تعمل إيه
تشرب شوربة عمو مفيد
تقوى و تقوى بالتأكيد
عز يعزك
تلقي سرور قال: العدلي يجيب مسرور
ييجوا البُعدا يغموا عنيك
ويصوتوا من بدري عليك
تفضل تصرخ من غير صوت
حلمك حبه بحبه يموت

تكبر زي نبات الضل

جواك حقد ويأس وغل
دمك يتقل تبقي ممل

وتبقي ف حزب من الاحزاب

او عضو ف مجلس كداب
تاخد حقك بالاجماع
والاحزاب اربع انواع

حزب الوز
وحزب الهز

وحزب العز
وحزب الطز

انا ارشحلك حزب الطز

والدسـتور اياه بينص
انك حي وميت
طزززززززززززززززز

ما فيش حاجه
مافيش حاجه
مانيش عايزه خلاص حاجه
ولا محتاجه انا لحاجه
ولو عايزه صحيح حاجه
مخليتوليش ولا حاجه
عموماً بصوا فيه حاجه
هقولها بس محتاجه
لعقول تفهم ولو حاجه
مهيش مفهومه او حاجه
نفسرها بكام حاجه
نوضحها بكام حاجه
وأهي حاجه مع حاجه
هتظهر وتبان لنا حاجه

وانا ما بخفش من حاجه
مانيش مسنوده ولا حاجه
لكن ما بخفش من حاجه
لكن فرضاً لو هقول حاجه
هيحصل إيه؟؟؟ ولا حاجه
هيعملوا إيه؟؟؟ ولا حاجه
و بعد الشر بعد الشر
لو واحد من القاعدين
من السامعين من الضالين
فِهِم حاجه هَيعملوا إيه؟؟؟
اكيد برضُه ولا حاجه
فنتوكل على الستار لوجه الله نقول حاجه
فيه ناس بتعيش علشان حاجه
وناس بتموت علشان حاجه
وناس بتموت على الحاجه
وناس تديلك الحاجه
وتبقى ليها محتاجه
وناس تديلك الحاجه
وتاخد أُدامها ميت حاجه
وناس تكبر تكون حاجه
وناس تصغر عشان حاجه
وناس منظر ومش حاجه

كلامى يا خلق فيه حاجه؟
لحـد دلوقتى فيه حاجه؟
كلام عادي وبسيط جداً ولا فِهشِ ولا حاجه
ما انا ما أقدرش أقول حاجه
صحيح نفسي أقول حاجه وميت حاجه
لكن مش قادره اقول حاجه
لأني لو هقول حاجه
هييجي ناس بتوع حاجه
وياخدوني ورا الحاجه
وهو لو سمع حاجه
هيعملوهالي ميت حاجه

عموماً بصو لو واحد من القاعدين
عاوزني أبلغه بحاجه
يقول مايخفش من حاجه

نعم فيه إيه؟؟؟
لالالالأ مافيش سرقه
ولا تهليب ولا تهريب ولا حاجه

وبتقول إيه؟؟؟
مصمصوا إيه؟؟؟

وخصخصوا إيه؟؟؟

ده كله كلام مفيش حاجه

قضية إيه؟؟؟
يا شيخ روح خلاص مافيش حاجه

حرامى إيه؟؟؟
ولَكّح إيه؟؟؟
وهرًب إيه؟؟؟
شـفافيه ومافيش حاجه

وبتقول إيه؟؟؟
لالالالأ عيب
لا فيه تدليس
ولا ترقيـص
ولا تدبيـس
ولا حااااااجه

سمع مع هووووس
انا حاسسه انه فيه حاجه

دقيقه سكات لَتبقى حداد

انا حاسه انه فيه حاجه
زمنكوا ياخلق فيه حاجه
ولازموا كام وميت حاجه
ده لو يعنى إذا كان فيه حاجه
انا عن نفسي مش حاسه ولا بحاجه
ولا متضايقه ولا حاجه

سعادتك برضه مش زيًي مافيش حاجة؟؟؟
أهـه بيقول مافيش حاجه

جنابك برضه مش زيًي وعلشان زيًي مافيش حاجه
أهـه بيضحك بيقول مافيش حاجه

ما أنا قولتلكوا من الأول مافيش حاجه
عليا النعمه يا اخوانا ما فيه حاجه
ورحمة ابويا
ويًا أبـوك
على إللّي جابوك
ما فيه حاجه

وعهد الله ... وعهد الله ... وعهد الله
ما خللولنا ولا حاجه

بقلك ايه؟؟؟
خلاص خلص و فركش
يلا يا اخونا مفيش حاجه

النساء و منصب الوزارة
قالوا الرجال إن النسا مالهمش في الوزارات
ونهار أبونا مِسا لو حكّموا الستات
في وزارة التموين والاقتصاد بالذات
حتضيع فلوس البلد في اللبس والبوتيكات
بالذمة ده اسمه كلام
يبقى وزيرنا مدام
واسم البعيد فتكات
يختي عليه لو مشي
يدخل مجالس إشي
لابس قميص شفتشي
من كلمة واحده يختشي
وينزل صويت وعياط
يا اهل العلام والادب
اقروا التاريخ اللي انكتب
فوق الطريق علامات
كليوباترا حكمت بلد
بالحيلة ويّا الجلد
من غير لا خُذ ولا هات
وكام من وزير كان قفا
جه في الطريق واختفى
ولهف وراه ألوفات
قصر الكلام يتقال
مين فيهم اللي يفيد
مش مسالة عضلات
وساعات كتير ستات بيكونوا رجاله
ورجال بطبع النسا
وطالعلهم شنبات

سـلام مربـع
سـلام مربـع
للي ربّع

او مدوّر
للي دوّر
في البلد دي ع الأمانـي
سـلام مربـع للأمانـي
وجمهورية كانـي مانـي
ولنظامها البرلمانـي

سـلام مربـع
للكبير اللي استربّع
فوق دماغ مشّش وصدّع
من كـلام عمال بيرسم
دنـيا حلوه فـ الأغانـي
سـلام مربـع للأغانـي

سـلام وداير ع الصوانـي
كـلام وماشي في ديل كـلام
ولحن تايه في الزحام
غنّى النظام علشان ننام على صوته
نمنا ما قومنا تانـي

سـلام مربـع
للي ناموا ماقاموا تانـي
اللي طافوا واللي خافوا
واللي شد عليه لحافُه
وغمّى عينه ع اللي شافه
وراح يقدم للي كمم صوتنا
ولابنه التهانـي
سـلام مربـع للتهانـي

ابن وز وغصب عنا في نيل هوانا
سوا برضانا او المهانه
راح يعوم
ابن حاكم يبقي حاكم
بالوفاق او بالمحاكم
في القانون المستحيل لازم يهون
والوريث يصبح رئيس
بشكل شرعي و فـ ثوانـي
سـلام مربـع للثوانـي

تشريعات على كيف هواهم شرّعوها
وعود قالوها وضيّعوها
ولعبة بايخه اتعودوها
ناس بترضى وناس بتخضع
ناس مُناها تحب تسمع
يبقى تسمع على مزاج
خطبه تخلق الف مصنع
خطبة تروي وخطبه تشبـع
خطبة تبنـي
فوق رمال الصحرا ألَفات المبانـي
سـلام مربـع للي بانـي

بانـي مجد عشان طموح
مجـروح جمـوح
ظالـم أنانـي
اللي علّى لاجل يعلا
واللي غنّى لاجل يغنا
واللي لما وريده يعطش
يملا بدمانا القنانـي
واللي عمّر واللي دمّر
واللي فكّك واللي سمّر
واللي حزّر واللي فزر
واللي عارض واللي هزّر
واللي شاف الباشا مصلح
واللي شافه وضيع وجانـي
سـلام مربـع للي جانـي

شيء يحزّن
لما صاحب الحق يشحت
لما لون الصدق يبهـت
لما يصبح في البلد دي
الشمال زي اليمين
شيء يحزّن.. شيء يحزّن
لما نرضى ونستكين
ولما يرقص طول السنـين
أراجوز لعيـن
بشكل سافر بهلوانـي
قال هوانـي.. وزاد هوانـي

سـلام مربـّع
للي قال انه هوانـي
وزاد هوانـي
للوعود البهلوانـي
للوريث المعجبانـي
للنظام البرلماني الكاني ماني

سـلام مربـع
للي قطّع واللي ربّع
واللي مزّع واللي وزّع
واللي قلّع واللي ولّع
واللي دلّع
واللي شخلع في البلد دي
لاجل تبقي
صورة أفظع
للنظام الامريكانـي
سـلام مربـع
للنظام المصر كانـي

يا بنت بلدي
يا بنت بلدي عيب ..
لما اللجام هيسيب ..
يسترخصوكي الناس
في بنطلون مزنوق ..
وبلوزه شبر لفوق ..
ولا حتى فـ الجمباز
عريتي تحت وفوق ..
ولا عدش عندك زوق ..
ولا حتى فيه احساس
لحم الخروف مدبوح ..
بنجيبه بعد الروح ..
ما تحصّــل الأنفاس
ولحمتك بالكوم ..
دكان وطول اليوم ..
مفتوح لأرخص ناس
يخرب زمنا زمان ..
كأنه عُمره ما كان ..
لا لينا اصل ولا اساس

رسالة من عبده مشتاق
بعـد مـا تجـنـن وفـاق
الولاية الرابعة ليك
والولاية الخامسة ليًه
خمسة وخميسه فى عنيكم

بطلوا لؤم وخباثه
حد جاب سيرة الرياسه؟
مالي أنا ومال السياسه

دى العبارة فى الدباره
نفسي ابقى وزير صغنن
والقى كرسي ف الوزاره
هو ده مش حق ليًه
والا يعني كتير عليًه؟

حبه ليكم وحبه ليًه
يوم عليكم ويوم عليه
والا يعني تكنشي فاكر
إنها ورث وتكيه
يا وزير بالاقدميه

الولاية الرابعة ليك
والولاية الخامسه ليه
نفسى اشوف شكل المنافق
والملاوع واللى نافخ بدلته ورافع إديه
والمراوغ والمقاوح
واللي عامل نفسه كافح
ربنا يعينك عليه

نفسى اشوف شكل المرابي
واللي كـوًش ع الاراضي
واللي نام وضميره راضي
وربنا غضبان عليه

واللي عامل نفسه ديب
واللي سقًف غصب عنه
واللي سـقًف رغـم إنه
عارف ان السقف عيب

الولاية الرابعة ليك
والولاية الخامسة ليًه
هو ده مش حق ليه؟؟
ولا يعنى كتير عليه
حَبه ليكم وحَبه ليًه
يوم عليكم ويوم عليًه

إمرأة في سجل الزمان

فلتكتبوني في سجل زمانكم
أني امرأة
أهوى القتال وما معي غير القلم
وقصاصة من دفتر قد تقرأ
لأصوب الكلمات جمراً نحو صدر القاتل
لتكون أقوى من قذيفة مدفعه

فلتكتبوني في سجل زمانكم
أني امرأة
لم تعترف بزمان قهر أو ألم
لم تعترف بزمانكم
زمن الضلالة والعداوة والمحن
عشتم خراباً في قلوب آمنة
وصرعتم الأحلام تحت المقصلة
أما أنا حلمي سيبقى كوكباً
رغم القتامة والظلم
شعري سيغدو خنجراً
رغم المرارة والألم
ولسوف أبقى صرخة
لأشق ليل الصمت في آذانكم
فلتسكتوني لحظةً
أو علقوني لوحةً بصدوركم

ولتكتبوني في سجل زمانكم
أني امرأة
أو فلتقولوا طلقةً
نحو الصدور الآثمه
يا من تصيدون العواطف
والرؤى بسهامكم
وتخبئون الشمس تحت ردائكم
الشمس تشرق ها هنا
روض سيغدو رغم أنف رمادكم
ولسوف أبقى ومضةً
لأضيء للرفيق وللحياة

فلتكتبوني في سجل زمانكم
أني امرأة
قد أهدرت كلماتها
وحروفها كانت حريق
يأ أيها الزمن العنيد
هل ضاع حلمي في الطريق
إني تمنيت ابتسامة طفلة للفجر يبسم ثغرها
وحمامة تأوي إلى أوكارها
وبزهرة للنور تفتح جفنها
تهوى رحيق
هل صارت الأحلام مسًا من جنون؟
لا يزيد؟
ما أضيع الأحلام في زمن عنيد
فلسوف يبقى الحلم ناراً تستعر
يهوى القلم أو ينكسر
أو تسقط الكلمات مني تنتحر
ثم اذكروني قصة لصغاركم
ولتكتبوها في سجل زمانكم
(
يحكى هنالك امرأة
سقطت صريعة حلمها
وشهيدة الأحلام
في زمن بغيض)

ديمولوخيه
سألت جارتنا أم بهيه
جوزها العامل فى البلديه
ما تقوللي يا افندي يا جوزي
معنى الكلام الأراجوزي
اللي قالوه فى التلفزيون
ديمراقراطيه .. ديرنقاطيه
كلمة ما تيجي في يوم ع البال
واحلف دي شتيمه يا عبدالعال

قام قالها السيد جوزها
وهي بتمط في بـوزها
ما تبطلوا جهل يا جدعان
ديموقراطيه يا بهيه
ما تفهمي بقى يا وليه
ديمقراطيه ... ديمقراطي
خصمي الكباب عند الحاتي
واتعشي على كيلو حراتي
وانا أبوس فى قرطاس طعميه
ديمقراطيه ومقريه
فى صحف جرايد مطويه
بتقول نعم بكره وبعده
ولحد ألفين سنه جايه
ديمقراطيه دي لعبتنا
عملوها جدعان حتتنا
عشان ما تحلوً صورتنا
ويصـدقـوا إن عيشـتنا
عايمه فى بحور العسليه

ديموقراطيه ندلعها
وساعات كتير نلوي دراعها
وانا مستعد ارجعها
بس اشتري يوم عتقيه
ديموقراطيه .. ديموقراطرط
وكلام كتير وبقى مرط رط
والكل مبسوط ومزقطط
ببرباطوسه اللى منقط
من كدبه بقى ماشى يسقط
على باب حارتنا المنسيه

ديموقراطيه اتجنن قول
تحيا البقول ويعيش الفول
رزق المدهول على المسطول
والعيشه حلوه مسليه

ديموقراطيه هيً ومش هيًه
بس الشبه عشره الميه
تسعه عشان العالميه
واحد لمون بالملوخيه
ما تسكتي بقه يا وليه
فى داهيه روحي انتي وهيه
دي عشان تفوت الورديه
يموت غفير عشرين ميه
وأعيش خروف من غير ليه
وأموت قتيل وما ليش ديه
وتعيش جناب الدى مو لو خيه

مفيش حوار
هذه القصيدة كتبتها الشاعرة
تأثراً بالثورة المصرية التي انصاع لها
الرئيس مبارك معلناً تخليه عن السلطة
وتقول فيها:
اول نزيف الأمل حبات ياقوت نوار
احمد وسالي وسيف نبض وعروق احرار
فجر وضمير اندبح طرح الوجع ثوار
قالوا حقوق الناس ترجع لاصحابها
متقولو يا اهل البلد مين اللي خاربها
اللي ما داق اللضا ولا اللي ناهبها
اللي يجيب حقها ولا اللي يسلبها
عشاق تراب الوطن والا اللي قلبها
ولاهما هيسلموا ولا هو هيسبها
ولا هما ملاك لها ولا هو صاحبها
احنا ولاد البلد والارض دي أرضنا
هما الي باعوا البلد وشربوا من دمنا
قالوا الشموس تنطفي يمكن يعيش هوه
قفلوا بيبان الوطن وعششوا جوه
فرعون يقول اضربوا والضرب في المليان
زغرد نيشانه وفلح واتفجر البركان
صوت العيال اندبح من قبل ما يسموا
لا لحقوا يتشهدوا كانوا لسه هيغنوا
ويقولو بسم العلم اتمرمغوا ف دمه
يا دباحين الوطن قتلتوا ليه حلمنا
وبإيه يفيد العوض وشبابنا ضاع مننا
لا تقول بقى مغفره
ولا عفو عند المقدره
اصل الخراب منهم وهما اربابه
حزب الدمار حزبهم والكل نوابه
يوم ما البغال برطعت وظهر لنا نابه
فين العدالة بقى ياللي انتوا بتساوموا
فين العدالة بقى ياللي انتوا بتساوموا
والا الضمير اتخرس والحق ضاع دمه
يتحاكموا اه كلهم، والافعى اولهم
راس الفساد تنقطع حتموت شياطنهم
لكن نسيبهم كده هنشوف غيلان غيرهم
فمفيش مصالحه بين حياة وبين انتظار
ومفيش مصالحه بين هزيمة وانتصار
ومفيش ورا ظهرك حرس
ولا فيش جرس ولا فيش جدار
ومفيش عبيد هيقدمولك الاعتذار
مفيش خلاص ومفيش قصدنا الا القصاص
نبض الشوارع حسها بيقول خلاص
نور الامل والحلم مش هتوقفوا طلقات رصاص
مفيش قصادك الاختيار
ومفيش خيار
ولسه دايره المعركة
فاهمين امور الفبركة
مفيش حوار
مفيش حوار
مفيش حوار



2 
مهره

ومفيش خيار ولسه دايره المعركة

فاهمين امور الفبركة


مفيش حوار

مفيش حوار

مفيش حوار


كلآم ميه ميه
لا غبار عليه
احيانا اخي اكريم / عز الرجال
الواحد يوصل لدرجة الانفجآر
وهذه اعلى مراتب الغضب والغيض
يقول كل شيء
لا يبالي بأي حاجه
الصراحه
رآئعه

صح لساان قايلها
وصح احساااسك اللى امتعنا بها
انتقااائك رااق لي كثيرا
لاامس احسآسي

شكرا لقلمك
شكرا لسموك
دمت بود لا ينضب
مهره.


3 
عمرو شعبان

روائع من روائع عز الرجال

يقيم صاحب الروائع وتزين بخمس نجوم
احسنت


4 
طيف الحرمان

بجد رائعه جدااااااا
وممتازه
أنفجار ثورة شاعريه
لم تترك شىء

ولامعنى حتى تغنت بيه
أخى / عز الرجال
دوما رائع
فى الاقتناء
كلمات عبرت عن الغضب المكنون
والغل المحفور
من الظلم القاهر
والحق المهدور
يسلم قلمك البارع
وكيانك الذى أنطرب لها
تقبل منى
فائق أعجابى وتقديرى


5 
الفارس الابيض

كلماتك تدل على حسن خلقك وبريق ذائقتك
فلاتحرمينا يوما الحسن وبريقه
روعه وجميله جدا
تسلم أيديك على ماقدمت

شـكــ وبارك الله فيك ـــرا لك ... لك مني أجمل تحية .
أخوك
الفارس الابيض



Powered by vBulletin® Copyright ©2000 - 2018, Jelsoft Enterprises Ltd.
Search Engine Optimization by vBSEO ©2011, Crawlability, Inc.
جميع الحقوق محفوظة لموقع ومنتديات الدولي ElDwly.com
جميع المواد المنشورة بمنتديات الدولي تُعبر عن وجهة نظر كاتبها فقط.