العودة   منتديات الدولى > المنتديات الأدبية > منتدى الشعر والقصائد

منتدى الشعر والقصائد القصائد النبطية والعربية الفصحى وكل ما يعنى بالشعر الحديث والقديم، أحدث قصائد رومانسية جديدة 2017


1 
عـز الرجال


يُبه شلونك
ملل هالكون من دونك!!..


قصيدة مؤثرة
وكلمات معبرة
ومعاناة صادقة
لخصتها هذه الابيات
التي راقت لي والتي أتمنى
أن تروق لكم أحبتي


يُبـه شلـونك ؟؟

يبه شلونك ؟؟؟...ملل هالــكــون من دونك

يبه شلونك ؟؟
وتمضي رحلة الدنيا
بليا طلة عيونك..؟؟ !!
يبه شلونك ملل هالكون من دونك
يبه شلونك ؟؟
وشلون المرض وياك ؟؟

بعد ما هدك بدنياك ؟؟
عساها تغمض جفونك ؟؟


تبي تدري عن أحبابك ؟؟
عن عيون تغنا بك ؟؟
عن قلوب دفنها الشوق
وإذا جاها الغفا جابك ؟؟


يبه أمي تخيلك دوم
تغني لك مع القمرا

يبه واللي خذاك بيوم
خـذا ناس يحبـونك
يبه شلونك ملل هالكون من دونك
يبه حنا صرنا كبار
توفقنا وتخرجنا

يبه ما عاد فيه صغار
يموج بهالزمن كل شي

نبيع العمر والدنيا
ولا تخلف بنا ظنونك


يبه شلونك ؟؟
تبي تدري عن أخباري ؟؟

عن أفكاري وتذكاري ؟؟

أشيلك داخلي جمره
وبعيون الحزن عبره
تغرقني .. وتحرقني

يبه شلونك ملل هالكون من دونك
أشوفك للرجولة اسم
إذا شد الزمن تقسى
واحلم من معاني الحلم
أحسك مقبلٍ بكره
وعيا لإيجي بكره !!


يبه تذكر زمان مر؟؟

يبه تذكر مجالسنا ؟

مقلطنا ومجلسنا ؟

وحارتنا ومسجدنا ؟


يبه تذكر هدايا العيد ؟

صلاة العيد؟ وبشت العيد؟


يبه تذكر سوالفنا ؟

لأجل هذا

وكل هذا

أقول اليوم يا يبــه

ملل هالكون من دونك


يبه وينك ؟؟
ولهت لنظره من عينك


يبه وينك ؟؟


أشوفه طوّل غيابك !!
ومن ودّاك .... ما جابك !!

يبه شلونك ملل هالكون من دونك
قالوا ما يدوم الزين !!
و أنا عندي أمل للحين

و لكني أعرفك وين !!


يبه وينك ؟؟

عسى الداعي يبه بس خير ؟؟!!

عساك بخير .... مداين تكرم لعينك


بس أرجوك علمني ...

علمني .. يبه وينك ؟؟

يبه شلونك ملل هالكون من دونك
سألت أمي عن رجوعك
ولكني أعرفك وين !!


قالت:
ما يدوم الزين !!
و انا .. عندي امل للحين

في رجوعك !!
يبه بس تكفى علمني

متى رجوعك ؟؟
يبه بس تكفى علمني .

وش أحلى من طلوع اثنين ؟؟

طلوع الشمس .... و طلوعك

يبه وينك ؟؟


سألت أمي .... غيابك طال ؟؟

ولكنّي أعرفك وين !!

و قالت مثل ما قالت:
حسافه ...
ما يدوم الزين
يبه شلونك ملل هالكون من دونك
مع كل هذا صدقني
أنا عندي أمل للحين !!


سؤالي عنك يا لوالد
صار كما الموال

و أشوفه طال ... والله طال


حزين .. بلحنه و حروفه
يخاف .. يموت من خوفه
و قلب ٍ كان أقوى قلب
ضعف .. من قسوة ظروفه


يبه
!!
أرجوك علمني ؟؟

تشوف اللي أنا أشوفه ؟؟

أنا أشوفك نهار و ليل

في وسط المجلس تصلي
و تدعي الرب ييسر لي

يبه شلونك ملل هالكون من دونك
يبه ... !!
ما عاد بي من حيل
وين الحيل ؟؟

و أنا أشوفك نهار وليل
مع أني ادري ما ترجع !!


غريبة ... بعدها تدمع !!
عيوني من هموم البين !!
ادري يبه مكانك وين ؟؟!!
مع َ هذا .. أرد و اسأل !!

يبه .... وينك ؟؟

يبه شلونك ملل هالكون من دونك
و لكني أعرفك وين !!
شبكت العشر في غيابك
على راس ٍ كساه الشيب
و من وداك ... ما جابك


و لا ادري وش يخبي الغيب !!
و جرح ٍ عذ ّب أحبابك
يبه ...... عيّا يخف ويطيب !!


يبه.. كل جرح في الدنيا
مصيره بالدوا يلتم
و لكن البلا من جرح

نزف فرقاك ... بليّا دم !!
و هذا الفرق في جرحي
عجز يلقا الدوا دكتور
أنا جرحي غريب الطور !!

ينزف ... بس بليّا دم
و زاد الهم فوق الهم
و دام انك يبه غايب
جروح ألغيبه ما
تـلتم

بس عندي أمل للحين !!
و لكنّي أعرفك وين !!

يبه .. ذكراك تفرحني

في نفس الوقت تجرحني !!
لا من جبت في طاريك
دموعي غصب تفضحني

يبه شلونك ملل هالكون من دونك
يبه .. تذكر ليالي الصيف ؟؟
عرس الحي .. ورقص السيف ؟؟

وكرم قلبك معَ هالناس
كل ٍ كان في بيتك ضيف


ألا يا حيف .... ألا يا حيف

زمن قاسي .... زمن قاسي

اخذ مني بلا رحمه
اخذ مني اعز ناسي !!

و خلاّلي سهر هالليل
في عيني ضيف .. ألا يا حيف !!


يبه وينك ؟؟

تعال و شوف

كبرنا مثل ما تمنيت
درسنا كل ما حبيت
نصلي مثل ما وصيت
و ندعيلك في كل ظروف

يبه شلونك ملل هالكون من دونك
يبه وينك ؟؟
تعال و شوف
صحيح الدنيا ما ترحم

تجرعنا التعب أنواع
ولكن الأمل ما ضاع

وأنا عندي أمل للحين !!
و لكني أعرفك وين !!


يبه تذكر شطانـتـنا ؟؟

أنا و أخواني و أخواتي
معانا عيال حارتنا

نلعب في زوايا البيت
يبه ... والله أنا حنيت

لذاك الوقت في وجودك
إلا يا ريت ... إلا يا ريت

ترجع .. يا يبه حنيت


حسافه الدنيا ما ترحم

خذت منا .. سعادتنا !!
خذتك بعيد .. وخلتنا !!


يبه أمي تذّكرنا
بأيامك قبل ما تروح
تناديها.. يا روح الروح

تغازلها و تنظر لك .. مثل طفله
ملامحها عشق مفضوح

يبه شلونك ملل هالكون من دونك
في ذاك الوقت كنا صغار
معَ هذا ......... كنا نغار

عليها .. أو بعد منها ... كنا نغار


نحبك يا يبه ... ارجع
مثل شمس الفجر .. اطلع

حزينه الشمس في غيابك
ونفس الحزن فـ أحبابك
وأخاف الشمس من حزني

تغيب و ما بعد تطلع !!
يبه ارجع !!...
إذا لي خاطر فـ قلبك


تعال و زورنا بس يوم
مع انه ما يكفينا .. نشوفك يوم
نبي حضنك يدفينا .. ونشوفك دوم

لكن قلّت ألحيله
ويمكن مـ البطا ضاعت

و قلنا يوم !!

يبه سامحني بترخّص
قبل ينشف حبر الأقلام
كلامي بعده ما خلّص

و لكن موعد الأحلام .. حان

ولازم أوفي له.. بعد ما ضاعت ألحيله

أشوفك والوعد باكر !!

إذا فكّر يجي باكر ..!!
وبرجع أسألك وينك ؟؟

بس لازم تجاوبني
ترى عندي أمل للحين !!
و لكني أعرفك وين .. !!

يبه شلونك ملل هالكون من دونك
يبه شلونك ؟؟
ملل هالكون من دونك


يبه شلونك ؟

وتمضي رحلة الدنيا
بليا طلة عيونك


لأجل هذا
و كل هذا
أقول اليوم يا بـيـي

ملل هالكون من دونك
ملل هالكون من دونك
يبه شلونك ؟؟
يبه شلونك ؟؟
يبه شلونك ملل هالكون من دونك
يبه شلونك ملل هالكون من دونك
يبه شلونك ملل هالكون من دونك



2 
عطر البنفسج

[align=center]



يبه شلونك ملل هالكون من دونك
اشوفك كل يوم وعيوني تيجي بعيونك
ومااقدر اضمك واقولك يبه انت شلونك
يبه تلك القصيدة روت قصة شخص فقد ابوه
وانا اروي قصة فتاة لاتدري وشلون تقرب من ابوها
يبه شلونك يبه ملل هالدنيا من دونك
يبه قلبي مازال ينزف حسرة على بعده عنك

يبه قوللي وين وكيف اقدر اسولف وياك
واقراب منك يوم عن يوم
يبه ااااااه يا يبه



عز الرجال

اليوم كل قصائدكم كل وحدة اجمل من الثانية
وكلماتنا قليلة مقابل كلمات قصائدكم
فعلا اشكرك جدا جدا
لانها لانها
عبرت كثيرا عن شبه حاله تعيشها التائبة
لكن بوجوده

شكرا لك اخي

تقييم

[/align]


3 
صبر ايوب

[align=center]
شاعرنا عز الرجال
بحرفكَ الغائب تعود ..
ترسم الاهات ورود ..
وبإحلى المفردات تجود
وبين شروق الشمس ...والمغيب

تسكن صومعة... تنادي بدموعك ولامن مجيب ..
وبريشة قلم ...
ترسمُ لحناً .. لمن اشتقت حظنا
يشدوُ باعلى صوته: ويقول
اشتقت لك ياابي.......دون الاخرين
كنتُ هنا أحاول لملمه حروفي لتسطرُ لك ولو بالقليل
تقبل مروري البسيط
كل الإحتــرام والتقديــر




[/align]


4 
مهره

أخي /عز الرجال
رآآق لي حرفك
آدام الله عليك العآفيه

وابعد الله عنك الحزن
تقديري واحترامي لسموك
تقبل مروري


5 
عـز الرجال



يا التائبة شلونك
مللت الكون من حولك
أشوف الحزن في قلبك
ودمـع الهم في جفونك
وفي قولك وفي عيونك

غريبة عيونكِ بتدمع !!
وفكرك من هموم البين !!
يا ريت أدري مكانك وين؟؟
ومع هذا ... أرد و اسأل !!

إنت.... وينك ؟؟

إنت.... وينك ؟؟

كل جرحٍ فهالدنيا
مصيره بالدوا يلتم

بغير دمعه... بليّا دم !!
بلاش نزيد احنا الهم
وفوق الهم نزرع غم
و دام انك كبيرة شان
خلًي جروحكي
تـلتم
بلاش الهم فوق الهم
بلاش الهم فوق الهم

سعدت جداً بمرورك يا التائبة
شكراً لكِ على الكلمات الطيبة
وعبـارات الإشــادة والتقييـم
تقبلي محبتي واحترامي
دمتِ بحفظ الله ورعايته
وربنا يبعد عنكِ الهم والغم




Powered by vBulletin® Copyright ©2000 - 2018, Jelsoft Enterprises Ltd.
Search Engine Optimization by vBSEO ©2011, Crawlability, Inc.
جميع الحقوق محفوظة لموقع ومنتديات الدولي ElDwly.com
جميع المواد المنشورة بمنتديات الدولي تُعبر عن وجهة نظر كاتبها فقط.