العودة   منتديات الدولى > الأسرة والمجتمع > الموضة والجمال والأناقة

الموضة والجمال والأناقة أحدث الملابس والأزياء النسائية، مواضيع العناية بالجسم والبشرة وأحدث المكياجات وتسريحات الشعر والعطور


1 
هدوء القمر


كتاب خبيرة التجميل بوبي براون


.. ( الجزء الأول ) ..


مرحبا يااحلى بنوتات

قبل لا نبدا ، [أعتذر منكم] لأن الموضوع طـــويـــل

بـ هالموضوع بحط لكم ان شالله كل شي ، سواء أنا استفدت منه أو لا ،

الكتاب طبعا بالانجليزي فـ حاولت قد ما أقدر أترجم كل شي عشان تاخذون الزبدة وتستفيدون ،




BOBBI BROWN

MAKEUP MANUAL


for everyone from beginner to pro


كتاب خبيرة التجميل بوبي براون



يتكون الكتاب من قسمين رئيسين

الأول : Basics

يحتوي هـ القسم على 8 chapters رح أتطرق لهم بالتفصيل ان شالله ،

القسم الثاني : ARTISTRY ويتكون من 4 chapter ورح نمر عليهم نشوف ايش فيهم ،

كتاب خبيرة التجميل بوبي براون



chapter 1

MAKEUP ARTISTRY

تقول بوبي براون انها تهدف لـ كتابة ابسط درس مكياج ،تقول انها كتبت هـ الكتاب لكل امرأة تبغى تحط الميك اب كأنها بروفيشينال ،

وتكلمت على صفحتين عن بداياتها


كتاب خبيرة التجميل بوبي براون



chapter 2

EQUIPMENT




الأدوات
تقول سواء كنتي ما تحطين من الميك اب غير روج وبودرة ، أو كنتي فنانة مكياج ، رح تحتاجين الأدوات المناسبة اللي تساعدك فالوصول لـ اللوك اللي تبينه


كتاب خبيرة التجميل بوبي براون




رح نتكلم عن الـ makeup kits
ايش المستحضرات والأدوات اللي تحتاجينها سواء بالبيت او برا ،

اممم أناا الصراحة مرتبة نفسي ، وحبيت أكثر شي فكرة ان الميك اب اليومي بـ جهة ، والميك اب اللي نادرا ما نستخدمه بجهة ثانية ، أول شي أريح لك انتي لا جيتي تحطين ميك اب كل يوم ، ما يصير كل شي قدامك وتتوترين ، وأحسن للميك اب ما يتعرض للهوا كثير وما يخرب .

كتاب خبيرة التجميل بوبي براون

HOME MAKEUP

تقول بوبي براون ، رتبي مكياجك سواء بدرج بـ الحمام ، او بـ تسريحتك .
خلي الأساسيات والمستخضرات اللي غالبا تستخدمينها قريبة ،
والمستحضرات اللي نادرا ما تستخدمينها افصليها عن مكياجك اليومي.



هالشنطة او العلبة تحتوي على :
الكونسيلرات والمصححات ، الأساس أو المرطب الملون ، البودرة (لونين) ، الاي شدو ( 3 الى 4 ألوان أساسية) ، ايلاينر (جل وبودرة) ، ماسكرا ، بلشر وروج ومحدد شفايف ولب قلوس (ملمع)


كتاب خبيرة التجميل بوبي براون



EVERYDAY BAG

الأساسيات تشمل :

باليت او 2 فيهم فاونديشن + كونسيلر + بلش + روج ،
بودرة مضغوطة ومراية ، باليت بالألوان الأساسية للعين ، ماسكرا صغيرة ، ليب قلوس ، فرش صغيرة ، عينات من كريم للوجه


كتاب خبيرة التجميل بوبي براون


EVENING BAG

بما ان شنط السهرة ما تكفي لـ كثير من المنجات ، رح تختارين بـ عناية ،

ليب قلوس ،محدد شفايف،بودرة مضغوطة ، باليت للوجه تتكون من كونسيلر + فاونديشن + بلش

عطر صغيرة ، ومعطر للفم


كتاب خبيرة التجميل بوبي براون



IN YOUR DESK DRAWER

مستحضرات تتركينها بالدرج بالشغل ،

كونسيلر، فاونديشن ، بودرة مضغوطة مع مراية ، بلش ، مرطب شفايف ، روج أو قلوس ، اي لاينر أسود ، واي شدو أبيض أو فضي عشان تسوين لوك ليلي / فرش صغيرة ، فرشاة أسنان ومعجون ،



كتاب خبيرة التجميل بوبي براون



IN YOUR GYM BAG

بعد التمارين تحتاجين تنظفين وجهك وتبدين بالميك اب من الصفر ، جيبي هـ المنتجات معك :

مناديل تنظيف للوجه ، مرطب ، علبة باليت للوجه ، أو عالأقل مرطب ملون ، روج أو قلوس ، ماسكرا

كتاب خبيرة التجميل بوبي براون

FOR TRAVEL

تقول دايما خلي عندك شنطة جاهزة للسفر ، عشان ما تشيلين هم الترتيب ، وعشان ما تتوهقين لا سافرتي لأنك نسيتي شي( أنا ما عجبتني الفكرة ! يمكن لأني كل فترة أطيح بـ شي غير )

شامبو و كونديشينر للشعر بحجم صغير (أنا دايم اجهز علب صغيرة من دايسو وأحط فيهم شوي شامبو وشوي كونديشنر ، ماحب اللي بالفنادق ) ، مرطب للوجه ، مرطب للجسم ، باليتات ميك ابك الأساسية ، ميني ماسكرا ، بودرة للوجه وبرونزر ، self tanner ، روج او قلوس ، brush roll وفيه فرش صغيرة ، ملقط ، مشط وسبراي للشعر ، عطر ، كريمات معطرة لـ الجسم


كتاب خبيرة التجميل بوبي براون


Essential Tools

الفرش هي اللي تسوي كل الفرق في وضع الميك اب ، الكل من اكثر فنانات المكياج تمكنا وخبرة ، الى المرأة العادية اللي ما تحط غير الأسلسيات ، كلهم رح يستفيدون من الأدوات الصحيحة ،

فكري بالاستثمار بـ كم فرشة عـ الأقل ، مثلا للاي شدو والبلش والحواجب والاي لاينر ، هذي فرش أساسية ،



كيف نعرف الكواليتي والجودة لأي فرشاة :
حجمها
الفرش اللي تجي مجانا مع المنتج تكون حيل صغيرة وما تنفع ابدا ، مثل فرش البلش !

الشعرات الطبيعية
الفرشاة الونة من شعرات طبيعية راح تكون أنعم وتدمج الألوان أكثر وتعطي نتيجة طبيعية ، تحتاجين لـ الفرش ذات الشعر الطبيعي لـ المستحضرات الباودرية ،

الشعرات الصناعية
الفرش المصنوعة من الشعرات الصناعية احسن للمستحضرات الكريمية،مثل الكونسيلر ، الاي لاينر الجل ، الأرواج ،
غالبا ما يكونون أقسى من الشعر الطبيعي ، هذا ليش يعطوننا تحديد أدق وأكثر تحديدا ،

بعدين تكلمت عن أنواع الفرش اللي عندها بـ بوبي براون وكل وحده لإيش تستخدم ، معروفه هـ الجزئية وممكن تتطلعون عليها بـ موقع بوبي براون !



عند شراء الميك اب ، عطتنا بوبي براون كم نصيحة

DO
اشتري المستحضرات اللي لها أكثر من إستخدام ، مثل المستحضرات اللي نقدر نستخدمها لـ الشفايف والخدود مع بعض

DO
إشتري الفاونديشن في النهار وجربيه على وجهك بـ نور الشمس الطبيعي ،

DON'T
لا تحسبين ان أي مستحضر مكتوب عليه dermatologist tested أو مختبر من قبل أطباء الجلد ، لا تحسبين ان هـ المستحضرات بالضرورة صدق تم اختبارها من قبل أطباء ووافقوا عليها ،
لأن هـ العبارة تعني ان المستحضر تم اختباره ( بغض النظر عن نتائج الاختبار ! تخيلو !! ما عندهم سالفة )



العناية بـ أدواتك الميكابية

الفرش

اذا اعتنيتي بـ فرشك بـ طريقة صحيحة ، ممكن انها تظل بحالة ممتازة لـ العديــد من السنوات ،
هذا يشمل تخزينها بطريقة صحيحة ، وتنظيفها دوريا ،

لـ تنظيف الفرش : خذي قطرة من مستحضر تنظيف الفرش ، أو صابون للأطفال ، وحطيهم بـ باطن كفك ، ولفلفي الفرشاة على المستحضر أو الصابون ، غسليهم بالماي ، ولا تغطسين الفرشاة بالماي ، بس الشعرات هي اللي تتغسل وتتنظف ،
ولو وصل الماي لـ مكان اتصال الشعرات بالخشب ، رح يتفكك الصمغ ورح تطيح الشعرات .

نشفي الفرشاة على فوطة نظيفة ، ورجعي الشعرات لـ شكلها الطبيعي قبل لا تنشف ، وخليها تنشف .

نظفي الفرش تنظيف عميق كل شهر أو شهرين عـ الكثير ، واذا بغيتي تنظفينهم تنظيف سريع ، رشي عليهم مستحضر تنظيف الفرش ونظفيهم بـ كلينكس لحد ما يروح كل أثر للمكياج .


تنظيف الاسفنج

اذا كانت اسفنجاتك ذات جودة عالية ، رح تقدرين تنظيفنهم عدة مرات قبل ما تضطرين ترمينهم .
أو ممكن تشترين الاسفنجات الـ Disposable رخيصة ومتوفرة .



الباودر بف powder puff

فيه بعضهم disposable وفيه نوعيات ذات جودة عالية .
تقدرين تنظفينهم بنفس طريقة تنظيف الفرش ، وممكن تغسلينهم بـ غسالة الملابس ، أو حتى غسالة الصحون < قوية الصراحة .


الملقط tweezer care

هنا ما راح نتكلم عن التنظيف وانما عن العناية


2 
هدوء القمر

الملاقط تحتاجين تـزيدين حدتها ، تقول بوبي براون وديها لمحلات حديد هم يضبطونها ،
أنا اقول اشتري جديد وفكي نفسك هههههههه


eyelash curler care يسمونها عاقصة الرموش ؟ ماعرفت اترجمها

تحتاجين تنظفين اللبادة اللي جوا اللي تحمي الرموش لما تلفينهم ، واحيانا يجي معها غيارات للبادة ، احتفظي فيها وغيريها كل فترة .


العناية بـ الميك اب

هنا صورة تبين لنا شـ كثر نقدر نحتفظ بـ الميك اب :







CHAPTER 3
SKIN





الجمال يبدأ بـ بشرة ناعمة ، صحية و مشرقة < ندري ههههههه


أول شي تكلمت عنه بوبي براون هو الـ life style أو أسلوب الحياة

من غذاء ، لـ تمارين ، لـ النوم ، لـ نصائح بخصوص التعرض لـ الشمس
لـ اثر التدخين والكحول والقلق على البشرة

كلام انا حسيته مكرر وما يهمنا ابدا ، وأنا حابة أركز عـ الميك اب أكثر شي



بعدين تكلمت عن أساسيات العناية بالبشرة

وكيف نحلل بشرتنا هل هي عادية ، ام جافة ، أم دهنية ، مختلطة ، حساسة

انا الصراحة كل هـ الكلام ما همني ، ومافيه أي معلومة جديدة عشان انقلها لكم

تكلمت عن أهمية التنظيف ، والتونر ، والترطيب .




CHAPTER 4
FACE







هنا بدا الجد
هنا رح نتعلم الأساسيات ، الكونسيلر ، الفاونديشن ، البودرة


أول مرحلة هي تجهيز البشرة لـ الميكاج ، هـ الشي يتضمن عدة خطوات

1
حددي نوعية البشرة وحالتها.
تقول بوبي براون لازم كل يوم الصبح تشخصين حالة بشرتك ههههههه ، لأنها ممكن تتغير من يوم لـ يوم ، هـ الشي صحيح 100% ، أحيانا أنا ألاقي بشرتـي جافة ، وأحيانا حساسة ، وأحيانا دهنية

2
حددي أي المنتجات راح تحسن من حالة البشرة الحالية.
هذا يعني تحديد نوع المرطب ، اذا نحتاج جل لـ التحكم بـ الدهون أو لوشن مهدئ لـ البشرة .

3
اختيار الركيبة (formula) المناسبة من الفاونديشن لـ نوع البشرة وحالتها .
لأن عندنا كـثير اختيارات ، منها الـ stick، منها الـ tinted moisturizer ، منها الفاونديشن كامل التغطية ، البودرة، التركيبات الخالية من الـ oil ،

4
أختاري درجة اللون الصحيحة من الفاونديشن.

5
إختاري كونسيلر لـ المنطقة اللي تحت العين .
درجة أو درجتين أفتح من درجة الفاونديشن ،

6
إختاري البودرة المناسبة .
تقول بوبي براون ، احسن شي انك تستخدمين درجتين لـ البودرة ، لون طبيعي لـ كامل الوجه ، ولون أفتح شوي لـ تحت العين.



الكونسيلر خافي العيوب ، والكوريكتر مصحح العيوب

تقول بوبي براون ان الكونسيلر هو سر الكون LOL ،
تقول بوبي براون ان معروف ان الكونسيلر يخفي أي عيوب سواء حبوب ، تاتو ، اثار جروح ، احمرار بالبشرة ، رضوض ،
لكن الاستخدام الاكثر انتشارا هو اننا نستخدمهم لـ حول العين .

طبعا لكل مشكلة تحاولين تخفينها فيه كونسيلر وكورركتور مناسب !
يعني غالبا الكونسيلر اللي تستخدمينه لـ تحت العين ما ينفع لـ تغطية الحبوب أو عيوب البشرة .
كونسيلر تحت العين يكون كريمي أكثر + أفتح من درجة الفاونديشن ،

وتقول ان مرحلة وضع الكونسيلر هي أهم مرحلة بالميك اب بـ النسبة لها ، لأن الكونسيلر لو اخترناه واستخدمناه صح رح يخلي الوجه كله مشرق ،

اختاري زي ما قلنا لون افتح بدرجة أو درجتين من لون الفاونديشن ،

البشرة تحت العيون حيل رقيقة ، لذلك العروق الغامقة واللي غالبا يكون لونها أقرب لـ الأزرق (أتوقع هـ الشي يختلف حسب لون البشرة وحسب الجنسية او المنطقة اللي احنا منها )،
الكونسيلر اللي يكون لونه مايل للأصفر يخفي الزراق اللي تحت العين ويفتّح البشرة ،

وتقول ممكن ما تستخدمين الكونسيلر ، وانما تستخدمين فاونديشن ثقيل أو stick بدرجة الى درجتين أفتح من باقي الوجه ، كـ استخدام الكونسيلر .

المصحح أو الكوريكتور ، متوفر إذا كنتي تعانين من حالة سواد شديدة تحت العين ، ولما الكونسيلر العادي ما يكون كافي ،

ألوان الكوريكتور تكون بين الوردي والـ peach مشمشمي اذا كنا نبي نعالج مناطق لونها بين الأخضر والبنفسجي ،
وطبعا نحط طبقة من الكونسيلر العادي المايل للأصفر فوق الكورريكتور عشان ننهي العملية

وفيه حالات "مستعصية" او فيها اللون الـ أخضر أو البنفسجي جدا غامق ، بـ هالحالة ما رح نحتاج الكونسيلر فوق الكوريكتور < ما فهمت هـ النقطة الصراحة ،


كيف نختار الكوريكتور المناسب



هنا كيف ومتى نستخدم الكوريكتور اللي لونه قريب لـ الوردي ، نلاحظ العارضة بشرتها فاتحة ،



الخطوات اتوقع واضحة ، نبدا بـ بشرة نظيفة ، بعدين نوزع الكوريكتور ، بعدين ندمجه بـ أصابعنا ، وهالخطوة أنا احس مهمه لأن دفا الأصبع يدمج الكوريكتور زين



.. يتبع ..


3 
هدوء القمر




هنا شلون نستخدم الكوريكتور اللي جاي على peach ، هاللون نستخدمه مع البشرة الشرق أوسطيه ، سواء كانت بشرتك غامقة أو فاتحة ، لأن اللي يهمنا هنا هو الـ tone للبشرة ، مو الدرجة اذا غامق أو فاتح ،




هنا الـ peach الغامق لـ البشرات السمرا






هنا نشوف كيف نستخدم الكوريكتور مو لإخفاء أي عيوب ، وانما لـ تفتيح البشرة






الحين بـ نتكلم عن بعض المشاكل اللي ممكن تواجهنا بخصوص الـ كوريكتور والكونيسلر ، وكيف نعالجها


لو كان يتكتل أو يتجمع بالخطوط حول العين
غالبا ما تكونين استخدمتي بودرة كفاية لـ تثبيتهم


لو كان cakey
يمكن ما استخدمتي الكمية المناسبة من الكريم < ما فهمتها بعد ! أنا أحس يمكن البودرة الكثيرة هي السبب ،


لو كان فاتح بزيادة
استخدمي شوووي شووووي من البرونزر بطريقة خفيفة


لو كان غامق أو مو مشرق بـ الطريقة المطلوبة
حاولي تستخدمين كريم مرطب خفيف وبسرعة تتشربه البشرة ، بعدين عيدي خطوات الكوريكتور والكونسيلر ،




وهنا كيف نحط البودرة على المنطقة حول العين ،






نبدا بـ الكلام عن الفاونديشن






تقول الست بوبي براون ، ان الجمال يبدا بـ بشرة رائعة ، الفاونديشن المناسب رح يخلي بشرتك تبدو كأنك مو حاطة فاونديشن من الأساس ، بشرة ذات لون متناسق ومنظرها صحي


وتقول ان بعض الحريم يبتعدون عن الفاونديشن خوفا من المظهر الـ كيكي الكثيف ، اللي أحيانا يبدو كأنه ماسك أو قناع
مع ان المفروض حتى الميك اب الثقيل يظهر بـ مظهر طبيعي !


رح نتكلم عن عدة نقاط بخصوص الفاونديشن


1
التركيبة Formula


طبعا تختلف تركيبات الفاونديشن حسب نوع البشرة وحسب المظهر اللي نبي نوصل له ،


بـ نبدا بـ الأخف :


tinted moisturizer
يناسب البشرة العادية إلى الجافة ، يعطي تغطية خفيفة ويعتبر بديل لـ الفاونديشن ،
أنا الصراحة أستخدمه أكثر من الفاونديشن ،
ومرات اخلط شوي من الكريم المرطب بـ شوي من الفاونديشن وأسوي my own tinted moisturizer



tinted face balm
هذا الصراحة أول مرة أسمع فيه
لـ البشرات شديدة الجفاف ، يعطي تغطية خفيفة وترطيب عميق ، ويعطي للبشرة مظهر ندي ،



Stick foundation
لـ كل البشرات خصوصا الدهنية ، يعطي تغطية سهلة وسريعة وخفيفة ، وممكن اننا نحط كذا طبقة منه ونزود التغطية ، وتقول بوبي براون انه احسن فاونديشن لـ التصوير ،


Liquid foundation
الفاونديشن السائل
تقول بوبي براون انه لـ البشرات الجافة ، يرطب وينعم ملمس الوجه ، ويعطي تغطية من متوسطة وفوق.


Moisturizer Comapct
للبشرات الجافة والشديدة الجفاف ، تركيبة مرطبة تؤمن تغطية متوسطة الى كااملة.


Whipped foundation
للبشرات المختلطة، يوازن البشرة لأنه يرطب المناطق الجافة ، ويمتص الدهون من المناطق الدهنية،
يعطي تغطية متوسطة الى كاملة .


oil-free liquid foundation
لـ البشرة الدهنية ، ولـ البشرة المختلطة خصوصا بـ فصل الصيف ،
يمتص الدهون وينعم ملمس البشرة ، ويعطي تغطية متوسطة الى كاملة .


oil-fre cream foundation
لـ البشرات العادية والدهنية ، يمتص الدهون ، يؤمن تغطية متوسطة - كاملة ، اختيار مناسب عشان نغطي الحبوب والمسامات الواسعة.


Oil-free powder compact
لـ البشرة الدهنية ، تغطية متوسطة إلى كاملة ، ولأنه سهل انه ينأخذ أي مكان فهو مناسب للرتوش والـ touch-ups


Mineral powders
تقترحه بوبي على البشرات الدهنية .


بوبي براون قالت نقطة جدا جدا مهمة ،
ان اللي عندهم بشرة دهنية لازم تجرب اللون قبل لا تشتريه ولعدة ساعات ، لأن الدهون اللي تفرزها البشرة ممكن تتفاعل مع الفاونديشن وتغير لونه ،




2
كيفية إختيار الدرجة الصحيحة من اللون



اللون المناسب لازم يختفي من على البشرة .


تأكدي ان الفاونديشن أساسه أصفر Yellow-aldwlyaldwlyaldwlyaldwlyd ، لأن كلنا عندنا Under-tone أصفر طبيعي بـ بشرتنا ، لو اخترنا لون أساسه وردي رح يطلع شكله أقرب لـ القناع !


تقول بوبي براون ان 1% من الناس بس ، اللي أساس بشرتهم أصفر ،


الفاونديشن مو مطلوب منه يغير لون الوجه ، وإنما يصفّي اللون .



جربي عدة درجات على جانب وجهك زي بالصورة ،
ومره ثانية على الجبهة






لأن أحيانا الجبهة تكون أغمق من باقي الوجه ،


وتقول بوبي براون لو لقيتي ان اللون اللي ناسب جبهتك أغمق من اللي ناسب الخدود ، خذي الأغمق لأنه بيطلع شكله أحسن (ههههههههه ادري محد فيكم بيسمع هـ النصيحة)



دايما جربي اللون بـ نور الشمس الطبيعي ،
ولا تجربين اللون على ايدك او ذراعك ، لأنه ابد ما يطابق لون بشرة وجهك


الـ stick فاونديشن لو كان افتح من لون البشرة ممكن تستخدمينه كـ كونسيلر .


3
الأدوات اللازمة لـ وضع الفاونديشن


تقول الست بوبي إن الأداة المناسبة راح تساعدك في وضع الفاونديشن أسرع وأسهل ، ورح تكون النتايج أحلى .


الخيارات واسهة ، الاسفنجة ، الفرشاة ، والأصابع عشان تدفي الفاونديشن ويندمج بشكل أفضل مع البشرة.



مشاكل ممكن تواجهك عند وضع الفاونديشن :


اللون مو مناسب
أضيفي طبقة من فاونديشن أغمق ، أو برونزر ،
طبعا هذي المشكلة أكبر مشكلة ممكن نواجهها بـ إستخدام الفاونديشن ، ويبيلها خبرة عشان نوصل لـ الحل المناسب.



لون الوجه ما يطابق لون الرقبة
روحي مع اللون الأغمق ( هذي بعد مارح تعجبكم هههههههه)


اذا تكونت طبقة خشنة تشبه قشر البرتقال
أول شي جربي حطي طبقة خفيفة من الكريم المرطب ،و طبطبي عـ البشرة ، بعدين زودي شوي فاونديشن ,
اذا ما نفع هـ الحل ، مالك الا تشيلين الفاونديشن وترطبين البشرة زين بعدين ترجعين تحطين الفاونديشن.


شكل البشرة : طحيني
اللون فاتح ! اختاري لون مناسب لـ بشرتك


والخطوات المصورة










الـجمـال في الـتـنــوع



البشرة الآسيوية





أكثر سؤال تطرحه ذوات البشرة الأسيوية ، هو " ليش استخدم فاونديشن أساسه أصفر ؟ مو كافي الصفار اللي بـ بشرتي؟ "
تقول بوبي انها جربت عدد لا يحصى من الفاونديشينات لين وصلت لـ هالقناعة ، الفاونديشن الأصفر يطلع شكله طبيعي على كل البشرات ، خصوصا الآسيوية !


نقطة ثانية: ذوات البشرة الآسيوية غالبا يكن معرضات لـ بقع من التعرض لـ الشمس ،
ولعلاج هـ المشكلة وإخفاءها بالميك اب ، تنصح بوبي بـ إستخدام مصححات بـ لون الـ peach ، او الكونسيلر اللي أساسه وردي ،


وتقول بعض الاحيان يقلب لون الكونسيلر رمادي خصوصا تحت الشمس ، هذي علامة انه اللون اللي اخترتيه فاتح



ننتقل لـ البشرة السمــراء


البشرات السمرا أو السودا تتفاوت كثير كثير فـ درجة اللون ، فـ تقول بوبي انو حطو ببالكم ان هذي نصائح عامة ولازم كل وحدة تشتغل حسب بشرتها ،


عموما البشرة السمرا ، تكون أغمق حوالين الوجه وعـ الجبهة وعـ الحنك ، وأفتح نص الوجه والخدود ،


so اللي نبي نسويه بالميك اب اننا نخفف الفرق بين هـ الدرجتين


بعض النساء يفضلن ابراز الدرجات الذهبية بـ البشرة ، وبعضهم يفضلون الدرجات الدافية بـ البشرة ، هذا شي يرجع لـ الذوق الشخصي


اذا بغيتي اللوك الذهبي ، خذي مرطب ملون tinted moisturizer ، وحاولي ان لونه يكون أقرب لـ نص الوجه من اللون عالجبهة ، وحطيه على منتصف الوجه ،
باقي الوجه خذي لون برونز محاسي وحاولي تدمجين اللونين


أما إذا بغيتي اللوك الدافي أو الـ warm ، فـ خذي لون فاونديشن يكون بين اللونين اللي بـ الجبهه وبـ منتصف الوجه ،


ما يصير تحطين الدرجة الأغمق على كامل الوجه لأن هـ الشي بيبدو مو طبيعي
وانتبهي من الـ منظر الرمادي اللي أكيد يكون سببه خلل في اختيار اللون المناسب


البشرات اللاتينية Latin Skin


عموما النساء اللاتينوز عندهم بشرة ذهبية ،
بعض النساء يلاحظن ان عندهم مناطق وردية خصوصا حوالين الأنف والفم وأحيانا عـ الخدود ، هالشي يرجع لـ حساسية ، لأن البشرات الللاتينية عموما أساسها أصفر مو وردي ،


تشدد بوبي براون على ان ذوات البشرة اللاتينية يناسبهم الفاونديشن المصفّر والـ ذهبي ،


وتقول انتبهو من انكم تبالغون بـ الذهبي وتصيرون برتقاليات .



البشرة الـ شرق أوسطية Middle Eastern Skin


هـ البشرة قريبة ومشابهة لـ البشرة اللاتينية ، لأن أساسها ذهبي .
العديد من النساء الشرق أوسطيات عندهم مشكلة السواد الشديد تحت العين (كنها حاسة)


أحسن طريقة عشان نخبي هالدواير السودا (اللي لونها أقرب لـ البنفسجي والأخضر أو البني الأخضر ) ، هي باستخدام الكوريكتور او المصحح الـ مشمشي peach ، والوردي أحيانا ،


اذا كاانت بشرتك مايلة لـ الذهبي أكثر ، إستخدمي الـ peach بدرجة وحدة أفتح من الفاوونديشن ،


أما ان كانت بشرتك أقرب لـ الوردي ، فـ خذي كوريكتور peach وطبطبي فيه عالمنطقة ، بعدين فوقه خذي كونسيلر مايل للوردي ( أنا حسيت هـ النقطة صعبة )


تقول غالبنا الدمج بين هـ اللونين يخلي لون المنطقة تحت العين مطابق لـ باقي البشرة !


تقول اذا كانت هالاتك السودا حيل حيل غامقة ، ممكن تحطين طبقة ثانية من كونسيلر أصفر ويحل المشكلة ،





هنا خطوات الفاونديشن والباودر للبشرة السمرا :




4 
هدوء القمر

البودرة
POWDER



اللون COLOR


مثل الفاونديشن ، البودرة تعمل بس لما تكون باللون المناسب ، تقول غالب البشرات تناسبها البودرة المائلة لـ الأصفر ،
بس حسب البشرة ما نقدر نعمم ، تقول عن البودرة الشفافة إنها مو شفافة وبتخلي وجهك رمادي



aldwlyaldwlyaldwlyaldwlyURE
تقول ان البودرة المضغوطة مناسبة لـ التعديل أو touch-ups ، وتناسب اللوك الطبيعي اللي ما يحتاج تغطية ،
اللوس باودر (السائبة او الحرة) أكثف وتعطي تغطية أقوى ،
البشرات الجافة غالبا ما تحتاج لـ البودرة


Tools
الأداة المستخدمة تعطينا الكمية المناسبة من البودرة ،
البوف : تعطي نتجية مخملية وملساء لـ البشرة
فرشاة البودرة Powder Brush : تفيدنا باننا نشيل الزايد من البودرة ،
الفرش الصغيرة : نقدر نوزع فيها البودرة على منطقة تحت العين



طريقة وضع البودرة :








البرونزر والسيلف تان
BRONZERS AND SELF-TANNER


اول شي كيف نختار اللون المناسب :
البشرات شديدة البياض (مثل الممثلة غوينيث بالترو) ياخذون لون وردي او مشمشمي peach
البشرات البيضا الفاتحة (مثل الممثلة درو باريمور) ياخذون لون بيجي بني ، مع شوية وردي
البشرات المتوسطة (مثل الممثلة سيينا ميللر) يياخذون لون بيجي بني ، بس مع شوية برتقالي
البشرات المتوسطة الداكنة (مثل جينيفر لوبيز) ياخذون لون بني برتقالي
البشرات الداكنة ( مثل الممثلة فانيسا ويليامز) ياخذون لون بني محمر
البشرات الداكنة الغامقة (مثل لاعبة التنس فينوس وليامز) ياخذون لون بني أزرق !


تركيبات الـ برونزر :
نلاقيه بـ لمعة وبدون لمعة ، نقدر نلاقية بـ هيئة بودرة او جل او كريم او سبراي




كيف نحط البرونز البودرة :







الجل :






وضع الـ سيلف تانر Self-Tanner Application





جهزي البشرة
دايما حطي السيلف تانر على بشرة نظيفة ناعمة ما عليها ميك اب ، والأفضل تقشير البشرة قبل بوقت خصوصا عـ الأماكن الخشنة مثل الاكواع والركب والأقدام .


حطي طبقة خفيفة ومتساوية الكثافة
واذا تبين تحطين كذا طبقة ، فـ ممكن تستنين الطبقة الأولى تتشربها البشرة يعدين حطي الطبقة الثانية ،
أسهل إننا نبني اللون طبقة طبقة من إننا نحوس الدنيا وما نعرف نصلح !



لا تنسين الرقبة والأذنين
اغسلي ايدينك على طــــــــــــــول
وهذي أنا صارت لي ، ومهما فركت وحطيت سكرب وكل شي ، اللون مو راضي يروح !


اذا بتحطين ميك اب ، حطي السيلف تان واستني عشر دقايق قبل ما تكملين ،
وحتى قبل ما تلبسين ملابسك ،


أغلب السيلف تانرز ياخذون حوالي ساعة لين ما يتغير اللون تغير كامل ، so حطي هـ النقطة بـ بالك وكوني صبورة




CHAPTER 4
BLUSH





طبعا البلش جزء ما يتجزأ من الميك اب ، عشان تعرفين اللون اللي يلبق لك تقول بوبي براون اقرصي خدودك ههههههههه ، وطالعي بالمراية وحاولي تجيبين أقرب لون لـ تورد خدودك الطبيعي ،،،
حلوة الحركة صح ؟ :P


BLUSH FORMULAS


POWDER
أسهل تركيبة ممكن نستخدمها ، سهل دمجها ومناسبة لـ كل البشرات .


GEL
يعطي لون خفيف sheer ،بس صعب دمجه ، ويبيله بشرة صافية ما فيها مشاكل .


CREAM
يعطي منظر فريش و dewy ، أكثر شي يناسب البشرات الجافة .


CHUBBY PENCILS
الأقلام الدبية ههههههههه ، ماعرفت أترجمها ، بس سهل التنقل وسهل الدمج ويناسب البشرات الجافة الى العادية (أول مره أسمع فيه الصراحة)


CHEEK TINTS
قريبة لـ الجل ، صعب اننا ندمجها وتحتاج بشرة ناعمة ،،،


POT ROUGE
يعطي لون سهل الدمج ، يناسب البشرات العادية والجافة ، غالبا يكون مثل الكريم بعلبه صغيرة POT ، وممكن نستخدمه لـ الشفايف ولـ الخدود .



.. يتبع ..


5 
هدوء القمر

CHAPTER 5
LIPS




التركيبات المختلفه لـ الأرواج :

matte
الروج المطفي ، كثيف ويبقى لـ مدة أطول ، بس ان ترطيبه قليل مقارنة بـ التركيبات الثانية ، ما يناسبون الشفايف الجافة.

semimatte
أكثر ترطيب من المات ، لكن اقل ثبات !

sheer colors
شفافة سهلة الإستخدام .

stains
تبقى لوقت طويل لأنها تصبغ الطبقة الخارجية من الشفايف ،

tints
مثل القلوس ، تحمي الشفايف وترطبهم ، وغالبا فيها حماية من الشمس .

balms
مرطب وفيه لون < مختصر مفيد

gloss sticks
تغطية شفافة وتشبه الشير والقلوس ،

lip glosses
ترطب ، تحمي من الشمس ، تعطي مظهر ممتلئ للشفايف ،


chubby lips pencils
ممكن نستخدمها لـ تحديد الشفايف ، ولأنها كريميه نستخدمها كـ روج بعد ! تبقى لـ فترة طويلة لكنها تنشف الشفايف ،

lip liners
المحددات ، نستخدهم كـ محدد ، ونقدر نستخدم كـ طبقة على كامل الشفايف قبل ما نحط الروج عشان يبقى معانا اللون فترة اطول




طريقة وضع الروج :




والمحدد :



والليب قلوس :







.. يتبع ..



Powered by vBulletin® Copyright ©2000 - 2019, Jelsoft Enterprises Ltd.
Search Engine Optimization by vBSEO ©2011, Crawlability, Inc.
جميع الحقوق محفوظة لموقع ومنتديات الدولي ElDwly.com
جميع المواد المنشورة بمنتديات الدولي تُعبر عن وجهة نظر كاتبها فقط.