العودة   منتديات الدولى > المنتديات الأدبية > منتدى الشعر والقصائد

منتدى الشعر والقصائد القصائد النبطية والعربية الفصحى وكل ما يعنى بالشعر الحديث والقديم، أحدث قصائد رومانسية جديدة 2017


1 
عـز الرجال


احبتي الأعضاء المحترمين
على مقولة أحد الشعراء الذي قال:
فلا نزلـت عليَ ولا بأرضـي
سحائب ليس تنتظم البلادا

فقد راقت لي هذه القصــيدة (غرام أحباب)
ومن شدة إعجابي بها أردت أن أنقلها لكم
لعلها تروق للكثيرين منكم، فأهلاً وســهلاً


غرام أحباب

على ذاك الطـريق اللي يســـمونه غــرام أحبـاب
وطت رجلي على دربه ولا ادري وش نوى فيني

تبعتـه لآخـر دروبـه أليـن أن القمـر قـد غـــاب
تعـب قلبـي ولا تعبـت مســـــــــافاتٍ تودينـــي

لقيت الليلة الجردا هـدب ظل وسـما واعشاب
بعــد ذاك الظــلام اللـي يتـوهنـي عنــــاوينـي

صدفتك معجبه فيني ويا ليت الغرام إعجـاب
تراك انتي الهنـوف اللي هقيتـك تســـتحقيني

عطيتك عشق من قلبي وسلًمت لغلاك رقاب
وغيـرك يحتــرق قلبـه ولا يقــدر يحـاكينـي

أنا قبلك صدفت عيون لكن ويش جاب لجاب
ترى كـل العيـــون اللـي لقـتني ما تكـفينــــي

رماني حظـي العاثـر عليـك وجـيت لك طـلاب
ولا إنتي اللي عشقتيني ولا إنتي اللي عتقتيني

تعالي واعتقي ذاك الخفـوق المولـع المرتـاب
مهب لاجلـي عشــان الله يجـازيك ويجـازيني

تعدي في سما عشقي ولو عشقي خراب أصحاب
وصـوني بالهـوى نفســـك قبـل لا انتي تصـونيني

وشـيليني على متنـك خفـوقٍ باريٍ منصـاب
ومن فـوق الغـرام العـذب شــيليني وحطيني

ولا منك هقيتيني شــجاع وما يطيق يهــاب
أنا لـك بالهـوى والله مثـل ما انتـي هقيتيني

أنا ما أمشـي ورا غيـرك ولو أنه يطـق الباب
وترى عيبٍ عليّ أطعن ولو كثرت سـكاكيني

زهـودٍ ما يطيـق الـدم لا دايـن ولا طــــلاب
شـجاع وعارفٍ نفسـي وأظن انك تعرفيني

غيورٍ ماعرفت أضحك مع الغدر ببّرود أعصاب
أبيييييييع عيـوني الـثنتيـن قبــل إنـك تخـونينــي

إذا شــد الغرام اتـرك خـفوقي بين نـاب ونـاب
لفرقى تكسًــر ضـلوعي ولا عشـــقٍ يـوطّـيني

أنا رجلٍ ولي غيره وإذا شـفت الهـوى كـذاب
تثــور بقـلبـي الفـزعه ولا تهـدى شــياطينـي

سـؤالك لو يزعـزع بي كياني ما قبلت عتاب
اجي لك وأسـالك نفـس السؤال اللي سألتيني

عن العشـق القديم أبـواب تقفيها كثيـر أبواب
بعد ذاك الحـبيب اللي خـدعني وانخـدع فـينـي

أبي عشق تحسب له كل نظرات العيون حساب
وابي قلـبٍ علـى قلبـي وابـى ديــنٍ علـى دينـي

وابي نظرة عطا توفي ولا تخلف بدون أسباب
وابـي منــك قبــل لا انتـي تصــديني تـودينــي

وابي دربٍ على العذال صعب ومتعب وغلاب
وابي نفـس الطـريق الصـعب يبعـدهم ويـدنيني

ترى لو للقلوب عيون ولدموع العيون أهداب
حشــى ما تنـزل الدمعــه لغيـرك لو تـركتينـي

أنا اول من عرف قدرك وانا توي صغيرٍ شاب
وابـي منـك مـا دام إنـك عـرفـتينـي تـحــبينـي

ما دام أني لقيتك في طريق إسمه غرام أحباب
دخيــــل الله وبـعـــد الله دخيــــلك لا تـخـلـينـي

ما دام إن كل من يحيا على وجه التراب تراب
عســى تنســـاني الدنيـــا ما دام أنتـي ذكرتينـي


نقلها لكم أخيكم المحب: عز الرجال



2 
انوسه

ترى لو للقلوب عيون ولدموع العيون أهداب
حشــى ما تنـزل الدمعــه لغيـرك لو تـركتينـي
والله ياعز الرجال اجمل ما كلمات واحلى نقل

سلمت يداك على النقل الراقي
دمت بود



3 
صبر ايوب

[align=center]
عزيز وفي القلب واعز الاصحاب
ومن هو لعندك ياخذني يوديني

شعرك يجبر الخواطر ويسعد الاحباب
وكلامك يزيل همي وجروحي ويشفيني

عز وابن رجال اصيل وضني فيك ماخاب
والكل اليوم على صحبتك صار يهنيني

الي صاحبك عمره ماعرف الشيب ولا شاب
حلو طيب المعشر وشعرك دايم يطربني ويشجيني

شعرك موحرف ولاسطر بكتاب
شعرك بالحق سيف تهابه السلاطيني

عزيز النفس سيد الانساب
صوتك لاعلة تستكت كل الدواويني



الغالي عز الرجال تسلم ايدك على روعة نقلك
من اجمل الاشعار التي قراتها راقت لي كثيرا

تقبل مرور اخوك
[/align]


4 
ياموت وين شيهانه

اخوي عز المرااجل سلمت يدك على النقل رااق لي مااراق لك 00

ما دام أني لقيتك في طريق إسمه غرام أحباب
دخيــــل الله وبـعـــد الله دخيــــلك لا تـخـلـينـي



5 
عـز الرجال

الغالية انوسه

انوســه من ذكرتك قلـت طوًلي يا مشـــاويري

انا ليه التفت للناس وعيونك جماهيــــــــري

هلا بك من القدم للراس للشعر اللي منـــــثورٍ

هلا في كل شـي فيكي وانتي اغلى مســاييري

وانا مهما مدحت اسمك دوم اشعر بتقصيري

لك محبتي وتقديري

عز الرجال



Powered by vBulletin® Copyright ©2000 - 2018, Jelsoft Enterprises Ltd.
Search Engine Optimization by vBSEO ©2011, Crawlability, Inc.
جميع الحقوق محفوظة لموقع ومنتديات الدولي ElDwly.com
جميع المواد المنشورة بمنتديات الدولي تُعبر عن وجهة نظر كاتبها فقط.