العودة   منتديات الدولى > المنتديات الأدبية > منتدى القصص والروايات

منتدى القصص والروايات قسم خاص بعرض أشهر القصص القديمة والحديثة، قصص خيالية وواقعية مكتوبة، أجدد قصص وحكايات 2017


1 
سكون الجو


الجزء 1



=========


احباب وقصتهم قصة , ونهايتهم ومالحكم عليهم !!!!؟ , اهم من ألعاب الحب
ام من أذلال الرومانسيه !!!!؟
حياتهم رسموها كما يرسموا دراستهم ونهاية طريقهم في الحياة , لكن
هل من بعد ماخططوا عرفوا اسرار الحياة !!!!؟
اختاروا نصيبهم لبعض وقدروا انهم سيلتحمون ببعض لكن الالتحام والاختيار
هل جمعهم !!!!؟
مرحوا وضحكوا وعاشوا كل مشهد في الحياة وكأنها سيرك وهم يلعبون بداخلها
, اتفقوا على ان يكون قلب الاثنين يذوب ببعض لكن الذوبان هل سيطيعهم !!!!؟
كل واحد سيبتسم للاخر ان رأه , والشهامة فكل موقف , واللعب لن يأخذ الواحد
مكان الاخر , لكن هل تلك التصرفات ستستمر للابد !!!!!؟

جنان وخالد

اطفال , شاركوا مسلسل الكرة الارضية وعاشوا بموقع بقرب من البحر واختار القدر
البيوت التي سيسكنون بها وقد اختار اكلهم وشربهم ومكان مرحهم وألعابهم
واختار المدينة الترفيهية التي سيتمتعون بها , وضعهم القدر في مدينة الدمام
وإليكم بداية زمانهم .
وصلت الصورة عند دريشة جواها معلمين يسولفون مع بعض , ابو زيد خلص من دفتر
التحضير حقه : ابو صالح للحين ماخلصت تحضيرك ؟
ابو صالح : باقي كم حاجه واخلصها .
ابو زيد : الا شلون مرتك ؟
ابو صالح : الحمد لله ماعليها .
ابو زيد : هي جابت من بعد منال ؟
ابو صالح : اييييه , والحين هي بخامس ابتدائي .
ابو زيد : الا بنتك الصغيرة شسمها ؟
ابو صالح : ممداك نسيت !!!؟
ابو زيد : والله مدري شفيها ذاكرتي هالايام ,, الظاهر بدى الزهايمر عندي .
ابو صالح : لااسم عليك من الزهايمر , الا زوجتك عاليه ليه طلقتها ؟
ابو زيد : مافيه نصيب .
ابو صالح : ليه ؟؟؟ البنت صار منها شي شين ؟
ابو زيد : يابن الحلال خلها على ربك , عندي الحين صيته وفدوى .
ابو صالح : والي طلقتها شجابت منك ؟
ابو زيد : سلمان وخالد .
ابو صالح : وهذولا وش كبرهم ؟
ابو زيد : سلمان بالثانوي وخالد ب 6 ابتدائي .
ابو صالح : ووشلونهم بعد امهم ؟
ابو زيد : بخير , ( رن جواله وكان جواله الرهيب ) الو .
فدوى : ابو زيد .
ابو زيد : هلا فدوى .
فدوى : لاتنسى الله يوفقك تجيب زيت العافيه ع طريقك .
ابو زيد : طيب , مع السلامة .
وسكر .
ابو زيد : ام العيال تبي زيت العافيه .
ابو صالح : وانت وش مطفشك ؟
ابو زيد : الحريم طلبات ليل ونهار , تقل عمرهم ماشافوا نعمة .
ابو صالح دق جواله ( الفيصليه ) : الو .
ام صالح : هلا والله بابو صالح .
ابو صالح : هلا فيك , خير ؟
ام صالح : يابو صالح قبل متجي البيت ابيك تمر المكتبة وتجيب لبنتك جنان ألوان خشبية
مائية .
ابو صالح : حاظر , مع السلامة .
ام صالح : بحفظ الله .
وسكر ابو صالح .
ابو زيد : ام العيال صح ؟
ابو صالح : ايه .
ابو زيد : ووش تبي ؟
ابو صالح : تقول البنت تبي ألوان خشبية .
ابو زيد : الا يابو صالح مافكرت تجيب شغاله ببيتكم ؟
ابو صالح : لا وبعدين مرتي ماتقصر معي .
ابو زيد : الله يهديك يابو صالح الحين بهالايام في احد ميدخل ببيته شغاله ؟ كل الناس صاروا
يشحذون الشغالات شحاذه .
ابو صالح : والله ام صالح راعية بيت وسنعة الله يحفضها وبعدين وشوله هالمصاريف ؟
ابو زيد : يلله عاد اترك عنك البخل الرجال بهالايام صارت حكاية الشغاله ببيتهم موضه
وانت تقول مصاريف .
ابو صالح : والله يابو زيد عندي ام العيال والبنات يعني مارح احتاج بأذن الله .
ابو زيد : يابو صالح , افرض منال جالها خطاب وش بتسوي بعدها وجنان ماعندها خبرة بالتنظيف
وام العيال الله يخليها لك بتكبر ومارح تقدر تشتغل يعني الشغاله لازمه بهالايام .
ابو صالح : والله مدري شقولك , ع العموم حنا الحمد لله حالتنا زينه يعني مانحتاجه واذا
بنحتاج مانحتاج الا بوقت العزايم وبس والي اعرفه عن مرتي انها تجيب صبابات بالعزايم .
ابو زيد : والله انا قلتلك وانت بكفيك .
ابو صالح : انشالله مانحتاج .
ابو زيد : الا يابو صالح شرايك نتغدى برى , نروح اي مطعم .
ابو صالح : بس انا بتغدى عند ام عيالي .
ابو زيد : يابن الحلال انت مبطي ماطلعت يعني وش بيضرك لو طلعت هالمرة ؟
ابو صالح : وانت وش هالمزاج عليك اليوم ؟ , يعني مصر تطلعني من بيتي ؟
ابو زيد : ام العيال بتشوفها كل يوم والمطعم ماتشوفه الا بالسنة مرة .
ابو صالح فكر وقرر : طيب , بس بعد ماينتهي الدوام .

=========

دخلت جنان بالمطبخ : يمه , اتصلتي على ابوي وقلتيله عن ألواني ؟
ام صالح : ايه وبعدين مسكتي واجباتس ؟
جنان : ايه وعندي سورة نوح وحفظتها , وعندي واجب بالرياضيات وحليته ,
ارتحتي !!!؟
دخلت منال : جنانوه !!!!! الام مانصارخ عليها فاهمه !!!!؟
جنان : طيب طيب بس انا من زود الاخلاق المقفله طلعت الحرة المكبوته .
منال : يلله روحي كملي واجباتس .
جنان : طيب .
وطلعت .
منال : يمه كلمتي هيا ؟
ام صالح : ايه وقالت بتجي العصر .
منال : يمه ................ انا موافقه .
ام صالح بانت عليها الفرحة : يعني اقول لأبوكي ؟
منال : يعني ماقلتيله ؟
ام صالح : بصراحة لا قلت بشوف رايتس عشان اعطيه خبر مرة وحده .
منال : ايه بس عرسي حطوه بالعطله الكبيرة .
ام صالح : طيب .

==========

ابو زيد : الا شخبار صالح يابو صالح ؟
ابو صالح : بخير والعسكريه موريته نجوم الليل .
ابو زيد : ايه عاد العسكرية ماترحم احد ( ورن جواله ) الو .
صيته : يابو زيد وينك انتظرك للغدى ؟
ابو زيد : والله نسيت لاتصل بتس اخلصي علي وش تبين ؟
صيته : شوف بنتك رهف مزعجتني تقول ابو اروح للملاهي .
ابو زيد : ايه لرجعت البيت يصير خير , مع السلامة .
وسكرها .

ابو صالح : مرتك الثانيه ؟
ابو زيد : ايه لجونا الحريم بطلباتهم .
ابو صالح : ووش تبي ؟
ابو زيد : رهف الصغيرة تبي تروح للملاهي .
ابو صالح : وانت وش مزعجك ؟
ابو زيد : فاضيين نودي بنات .
ابو صالح : المهم انا ماشي وبكره اشوفك .
ابو زيد : يلله اشوفك بكره مع الرجال بالمدرسة .
ابو صالح : مع السلامة .
ابو زيد : الله يسلمك .

=========

دخل ابو صالح وشاف جنان تكتب شي بالكتاب , ابو صالح : جنان .
رفعت راسها : هلا يبه .
وركضت وشالت اكياس من المخازن الكبرى .
جنان بشفايه : اشوف وش جبت !!!!
ابو صالح ضحك على بنته وقال : وين امتس ؟
جنان : امي بالمطبخ , مسويه رز !!!!!! ,, تطير للمريخ من ريحتوه .
ابو صالح : ايه وانا اقول ريحة الكشنة واصله للبقاله .
جنان ركضت للمطبخ : يمه يمه , ابوي جاب مقاضي .
طلعت ام صالح : اشوف .
ام صالح : جبت ألوان بنتك ؟
ابو صالح : ايه , جنان , تعالي خذي الوانك .
جنان نزلت من الدرج : ايه نسيت اخذهم .
وسحبت الكيسة وشوي وتفك يد ابوها !!!!
ابو صالح : شوي شوي .
اتجهت لغرفتها ودخلت وشافت منال ترتب دولابها , جنان : منوووووول , ابوي شرالي
الوان !!!!
منال بطفش : مبروك .
جنان : الله يبارك فيك , الا وشبتس طفشانه ؟
منال : عرسي بالعطلة الكبيرة ماتبيني اتضايق !!!.
جنان : واذا عرستس بالعطلة !!!! انا حفلة نجاحي بأخر الترم وماني زعلانه .
منال : ايه بس العرس غير وحفلة النجاح غير .
جنان تبي تشوف النهاية : اسمعي انتي من يوم انخطبتي ووجهتس قلب باذنجان ,
والله لو العرس معركة ترى كلها طقطقه .
منال : ايه بس ياجنان هم البيت والرجل والدراسه .
جنان : البيت نظفيه والدراسه ادرسي من مانعتس !!!؟ والرجل وش دخلوه !!!!؟
منال : انا بتزوج يعني بروح من بيتي لبيت زوجي وبس .
جنان : واذا رحتي لبيت زوجتس اظن مانتهت الدنيا !!!!
منال : بس انا بكمل دراستي وماقدر اوفي بينها وبين زوجي .
جنان ارتفع ظغطها : اوفففففففففف ,, منول انا اقولتس وش بتسوين , انتي اول ماترجعين من
المدرسة وكليه الغدى ونيمي للعصر واذا قمتي صلحيلوه فطاير وبيتزا واجلسي ذاكري لين الليل
واذا جاء الليل نيمي بالفراش ومن بكره روحي المدرسة , وانتهت السالفه !!!
منال ابتسمت لجنان الصغيرة .
جنان : ياربييييييييييييييييييييي!!! منول يعني مو عاجبتس كلامي !!!!؟
منال : الا بس الي يدينه بالنار مو مثل الي يدينه بالماء .
جنان : يعني انا بارده !!!!!؟
منال : لا , بس هم الزوج غير والحفلة غير .
جنان قربت لوجهها : ليش هو بيضربتس !!!!؟ والله لضربوه هالابن اللذينا .
منال ابتسمت : جنون , روحي لشغلتس احسنلتس .
جنان : ماني رايحه الا لما تقولين وش الي مضايقتس .
منال : جنون ترى مو ناقصتس .
جنان : طيب انا ابي افهم وش سبب العتمة الي بوجهتس !!!!؟
منال : قلتلك هم بيتي بعدين .
جنان : طيب !!!!
منال : وهم الرجال .
جنان سكتت وبعدها طلعت التهديد : شوفي ان ضربتس زي صالح قوليلي وانا اجيبلوه الجمر
واكويه مع رجلوه ( وصارخت ) اخليه مشلول !!!!
اتجهت لمكتبها وحطت علبة الالوان وقبل ماتتحرك انتبهت لوجود كتاب مرسوم عليه قلوب
حمراء ومكتوب عليه ( اسرار الحياة الزوجيه )
استغربت جنان من هالكتاب وابتسمت , جنان : منال .
منال ترتب بطفش : ها !!!
جنان : منال ( وخذت الكتاب ) لو يدرسوننا هذا بالمدرسة مو احسن من الرياضيات الي
يقلب الكبد !!!!؟
منال سحبت الكتاب بخوف : جنان لو اشوفك ماسكه هالكتاب مرة ثانيه لوريك الشغل فاهمه !!!؟
جنان استغربت : ليه !!!؟
منال : بس وسله روحي ساعدي أمي بالغدى .
جنان طالعت الكتاب وحست انه مفتاح لفيلم كرتون !!!
خذت الكتاب بدون ماتحس منال واتجهت لبرى الغرفة وفتحت اول صفحة
مكتوب بأول صفحة :
ألعاب رومانسيه والشوق الحب .
جنان فرحت : هالكتاب بوه ألعاب !!!!؟ وناسه ( تقصد منال ) افااااا ماهقيت انك تمنعيني من السعاده
, تبين تبعديني عن الالعاب !!!!؟ خوش اخت .
ورمت الكتاب .
نزلت من الدرج ومهي معصبة ودخلت المطبخ , يمه في شي اشيله ؟
ام صالح : ووشبتس معصبه !!؟
جنان : بصراحة ماتوقعت اختي بهالشر كله , تمنعني من قراية الكتاب الي فيه ألعاب ؟
ام صالح : ووش كتابه ؟
جنان : مدري , المهم انا طفشت منها , هالمرة تمنعني من سبيستون ولا وفي وقت
الدراسه تمنع اني ألعاب بالحوش , هين اوريها !!!
شالت الغدى وتغدت وهي طفشانه .
منال تذاكر شي بالكتاب , وجنان معصبه من حركة اختها , جنان : منول .
منال : ها .
جنان : الكتاب الي فيه قلوب كثيرة تقدرين تدرسينه بالمدرسة ؟
منال استغربت : ووش كتاب الي فيه قلوب ؟
جنان : الي منعتيه عني اني اقراه , شكله حلو من برى ليش ميندرس بالمدارس ؟
منال متدري وش ترد على جنان : بس لان هالكتاب ميدرسونه الا من ثالث ثانوي ومافوق .
جنان : بس مو انتي تقولين اني شاطره ؟ خلاص احفظ هالكتاب واطبقه بأرض الواقع .
منال عصبت وقامت : جنان اصحك تسوينها او تقرينه مفهوم ؟
جنان : ابي افهم وش هالكتاب الي معصبتن علي علشانه ؟؟؟ والله لو هو كتاب كيمياء
الي تكرهينه متعصبين علي زيه .
منال : بس قلتلك لاتقرينه فاهمه ؟
جنان
" عناد فيك لأقراه "

========

دخلت الغرفة بالليل وتفحصت ان المكان مافيه احد , اتجهت للدولاب وفتحته
لقت هالكتاب بوجهها .
تأملته وقالت : هالكتاب الي فيه قلوب ليش ماندرسه !!!!؟
جلست بالارض وفتحت اول صفحة وشافت وردة حمرة , فتحت الصفحة الثانيه
وشافت وقرت اول جمله , جنان : كيف احول حياة البرود الى حياة مفعمة
بالرومانسيه , وش معنى الرومانسيه !!!!؟
فتحت الصفحة وقرت اول مقطع ولما قرت نص انصقعت وسكرت !!!! :
ايش هالكتاب !!!!!؟ اول مرة احس بخوف , ليش اخاف والكتاب مليان قلوب !!!!!؟
حطته فوق السرير وطلعت .
الصورة اقتربت للكتاب الي فوق السرير !!!!!

=======

هيا : الا ماقلتيلي متى ناوين تجهزين نفسك ؟
منال : مدري بس لصار عندي اختبارات واجد اخلي طلعتي الخميس والجمعه .
هيا : طيب ليش مانروح للسوق الي جنب بيتي مرة حلو ورخيص .
جلست جنان وتأملت كلامهم .
منال : والله فكره , طيب متى نروح ؟
هيا : الحين .
جنان اول ماسمعت متى نروح فزت : وين بتروحون ؟
هيا : بنروح للسوق يله منال .
جنان : بروح معكم !!!!
منال : يعني وش بتسوين بالسوق ؟
جنان : اشتري حلاو .
هيا : والله ياجنان حنا مو فاضين لك ندورك اذا ضعتي .
ام صالح : عاد خذوها وش يضركم ؟
منال : يمه حنا محنا ناقصين دوخة راس من بنتك خلينا لحالنا احسن .
جنان : الا الا الا ( ونططت )
هيا : يلله امشي بس .
جنان فرحت : هييييييييييه .
وطلعوا من البيت وراحوا للسوق واتجهوا لمحل الملابس الداخليه .
جنان تبي تدخل بس شافت عايله دخلوا كلهم الا شاب بالعشرين مادخل , جنان رحمته !!!
اتجهت له وهزت ثوبه من تحت : لو سمحت .
الشاب استوعب الي نادته وتأملها ونزل لمستواها : نعم حبيبتي .
جنان : ليش ماتدخل مع اهلك ؟
الشاب : المحل مايدخلون فيه الا الحريم .
جنان : يعني ممنوع اصطحاب الشباب ؟؟؟
الشاب ضحك !!!! ,, الشاب : ايه .
جنان : حراااام , ( تذكرت ) اييييييييييييه , انتم بالعروس عندكم ممنوع اصطحاب الاطفال ؟
الشاب : لا .
جنان : حنا عندنا والي حر قلبي ان خواتك دخلوا والصغار مادخلوا وحتى انت , يعني ممنوع بالعروس
وبالمحلات ؟
وزعلت .
الشاب : بنتي انتي وش اسمك ؟
جنان : ماروح اقول الا لما تقول خواتك ليش يمنعونك عشان احل لك المشكله ؟
الشاب : بس , وبعدين في محلات خاصة بالاطفال وفي محلات خاصة بالحريم وبالشباب .
جنان : طيب , تتوقع المحل هذا الي مكتوب عليه ملابس داخليه في كاميرة مراقبه ؟
الشاب : لا , ليش تسئلين ؟
جنان : عشان لما يكون فيه كاميرات اسحب هالكاميرات واخليك تتفرج على المحل وانت برى .
الشاب : يعني تراضيه هذه !!!!
جنان تذكرت : اهااا , لحظة لاتروح .
وراحت للبقاله وطلبت جالكسي وطلعت واتجهت للشاب , جنان : خواتك مارحموك بس انا الي برحمك
وهذا جالكسي مني ( ومدت له )
الشاب ضحك : شكرا , يلله روحي لأمك
طلعوا هيا ومنال واتجهت جنان لهم , جنان : شفتوا خواتك الرجال مارحموه ولا دخلوه المحل
بس انا اشتريتله جالكسي !!!!
هيا : ايه بس يله تحركي .

===============


2 
سكون الجو

الجزء 2



==========

في القهوة الشباب شويين واغلب الي فيه شيبان , وكل واحد مشغول
بحياته الي يكلم والي يستهبل والي يلعب مع خويه ( الاونو )
توقفت الصورة يسارك واقتربت الصورة لزاويه في 2 شيبان وكل واحد
مسوي جلسة خاصة فيه .
ابو زيد يفكر بالموضوع يمكن له ساعة , وكانوا ساكتين لمدة ساعة وابو صالح
مشغول بكتاب , التفت ابو زيد وقال لأبو صالح : ابو صالح .
ابو صالح : هلا .
ابو زيد : الحين اذا تزوجت منال من الي بيدبر بالبيت ؟
ابو صالح : من يعني ام العيال ؟
ابو زيد : طيب في حل غير ام العيال .
ابو صالح : الي هو ؟
ابو زيد يفكر يقوله بس كان ساكت كان خايف من ردة فعله !!!! , ابو صالح : ابو زيد .
ابو زيد : هلا .
ابو صالح : وشفيك ؟
ابو زيد : لا ابد بس ............
ابو صالح : بس وشو ؟
ابو زيد : انت متأكد ان ام العيال تقدر ؟
ابو صالح : وليش متقدر ؟
ابو زيد : لا بس .............................. مافكرت تعرس على مرتك ؟
ابو صالح توقفت وبعدها التفت لوجه ابو زيد بهدوء : نعم !!!
ابو زيد : شفيك ؟
ابو صالح : لا بس ..............
ابو زيد : زي ماقلتلك , تعرس على مرتك احسن من الشغاله .
ابو صالح : بس مرتي عندي الدنيا كلها .
ابو زيد : يابو صالح انت عايش معها لين تعرس منال , طيب واذا اعرست من الي بيدبر
بالبيت ؟
ابو صالح : لالا , صعبه .
ابو زيد : والله انت الي تصعبها ولا الشغله سهله .
ابو صالح يبي يستوعب نفسيته !!!! , ابو صالح : مقدر .

ابو زيد طالعه بنص عين : متقدر !!!! وليه متقدر ؟
ابو صالح : زوجتي مو مقصرة معي بشي .
ابو زيد : لاصار شي بالبيت ومنال مو موجوده قل مقدر .
ابو صالح : بس .............
ابو زيد : وشو الي بس ؟
ابو صالح : صعبه .
ابو زيد : وشو الي صعبه الله يصلحك ترى زواج يعني وناسه !!!
ابو صالخ سكت !!!!!!

========

جنان فوق السرير ترسم نخله وعنده سيفين وترسم بحر وشمس وكورة وكفر
حق البحر , كان رسمها حوسه , تذكرت شكل القلوب الي بالكتاب .
اتجهت للكتاب وحطته قبالها وجابت الكراسه ورسمت نفس القلوب , بدت تبدع
بالرسم ولما خلصت اتجهت لأختها منال الي بالصاله .
جنان : منال منال .
منال تتقهوى : هلا .
جنان : شرايك بالرسمة ؟
منال اخذت الكراسه وبدت تتأملها : حلوة بس من اي صورة جبتي شكل القلوب ؟؟
اكيد من مجلاتي .
جنان : لا , بس في كتاب فوق سريرتس خذيته ورسمت شكل القلوب .
منال تذكرت كتاب اسرار الحياة الزوجيه , منال : طيب بس اصحك تقرينه ؟
دخلت ام صالح : منال حطي القناة الي فيها تفسير الاحلام .
منال : طيب .
جنان : يمه شرايك بشكل القلوب ؟
شافتها ام صالح : يازينها , شلون رسمتي القلوب ؟
جنان :رسمته من كتاب عند منال .
دخل ابو صالح : السلام عليكم .
الكل : وعليكم السلامة .
جنان : بابا شف الرسمة الي سويتها الحين .
شافها ابو صالح : الله تهبل , خلاص احتفظي فيها وخلي الابلة تشوفها .
جنان : طيب .
وركضت واتجهت للتلفون : الو .
ام علا : نعم .
جنان : هذا بيت ال...........
ام علا : ايه حبيبتي من تبين ؟
جنان : ابي علا .
ام علا : طيب .
وتركت السماعة وجنان تنتظر .
علا ردت : الو .
جنان : علا لايفوتك .
علا : الناس يسلمون اول .
جنان : ايه نسيت السلام عليكم .
علا : وعليكم السلام , وشو الي فاتني !!!!؟
جنان : وريت ابوي شكل القلوب الي بالكتاب الي قلتلك عنه , وابوي انجن عليها .
علا : على طاري الكتاب انا قلت لأمي وقالت لاتقرونه وانا ابي اعرف ليه .
جنان : المهم اسمعي كلامهم وكيفهم , المهم بكره شرايك نسوي خشرة ؟
علا : يعني وش نجيب ؟
جنان : اسمعي انا بجيب سندويشات بيض وانتي جيبي عصير الربيع .
علا : طيب , يلله مع السلامة .
جنان : مع السلامة .
وسكرت جنان ولما دخلت الصاله ابوها كان بعيد عنهم , بعيد مو بس عنهم كمان
باله مو معهم , باله لاكلام الي قاله خويه ابو زيد .
كان في دوامه هادئة ولا يدري هل القرار الي بيسويه صح ولا غلط , هالقرار كان
مخليه كسلان وطفشان ولا يقدر يقرر او يفكر وش الي فيه ؟
شافته جنان يفكر , اتجهت له وقالت : بابا .
ابو صالح : هلا .
جنان : وش تفكر فيه ؟
ابو صالح : وين امتس ؟
جنان : انا البعيده وشافتها , وانت يللي قريب ماشفت !!!!!؟
ابو صالح : جنان وين امتس ؟
جنان : اسفه , امي راحت للمطبخ عشان تجهزلك العشى .
ابو صالح : ومنال ؟
جنان : والله لهيت بدروسي ولاشفتها .
ابو صالح : طيب عطيتي جوالي .
اتجهت للطاولة الي فوقها tv واخذته وعطته ابوها .
ابو صالح جلس يطق بالارقام لين لقى ابو زيد .
ام صالح : ابوتس هاليومين مدري وشفيه , حسيته متغير علي .
منال تقطع السلطة : وانتي وش الي خلاكي تشكين ؟ شفتي شي منه ؟
ام صالح : انا ماشفت شي شين منه بس تصرفاته تغيرت بالاول كان متحمس معي بكل شالفه
والحين كل مااقوله اي موضوع يرد علي برود موطبيعي وكأن هالسالفه ماتهمه .
منال : طيب انتي حاولي تكلمينه وتشوفين وش فيه .
ام صالح : بعد مااخلص من العشى ابقوله .
دخلت جنان : منول في الباونتي الي بالثلاجة من الاسبوع الي راح وانا اشوفه مترزز
قدامي , حرام هو يبيييييينييييي !!!!
منال : لا والله يلله روحي لواجباتك .
جنان : ياشينكم يابنات هالزمن , تقهرون الواحد وتخلونه يموت جوع بسبب انانيتكم .
وطنشتها بطفولة .
الاهل يتعشون في المقلط وطبيعته متواضع الاثاث السبعينيه , انتفخت خدود جنان
من الاكل وخلصت وطارت لغرفتها ترسم , وجنان قامت تغسل باقي ثيابها وثياب امها
وابوها وجنان , اما ام صالح كانت متردده من الموضوع الي بتقوله .
ام صالح : يابو صالح .
ابو صالح سرحان : ..............
ام صالح : يابو صالح .
ابو صالح انتبه : ها !!!
ام صالح : شفيك سرحان !!!!!؟
ابو صالح : ها !!! لا ولاشي .(( ورجع يطالع فيها !!!!)
في غرفة النوم ام صالح قاعده تقرى كتاب حصن المسلم وابو صالح قاعد
وطالع فيها بنظرة طويله جدا !!!!!
ابو صالح : ام صالح .
ام صالح : هلا يابو صالح .
ابو صالح : انتي مصرة اننا نجيب شغاله ببيتنا ؟
ام صالح : مو لازم يابو صالح وبعدين البيت مافي بزارين مافي الا جنان وجنان ماتحوس .
ابو صالح : طيب ابي اقولك موضوع .
ام صالح : خير ؟
ابو صالح : ابي ............ ابي ادخل جاره عندك .
ام صالح جاها مرض الزمهرير !!!!!! , ام صالح : نعم !!!!!
ابو صالح : ابي اتزوج .
ام صالح للحين تحت التأثير !!!!
ابو صالح : ام صالح .
ام صالح للحين تحت التأثير !!!!!
ابو صالح : ام صالح شفيك !!!!؟
ام صالح : ابو صالح , انا عمري قصرت معك بشي !!!!؟
ابو صالح سكت !!!!!
ام صالح : عشرة عمر يابو صالح !!!!! تبيعني بعد هالعمر كله !!!!!؟
ابو صالح : ومن قال اني ببيعك ؟
ام صالح : انت تبي تدخل جاره ببيتك !!!! , وماتبيني انغث !!!!!؟
منال طلعت من غرفتها وحست ان في شي بغرفة امها وابوها فلزقت اذنها بالباب !!!!
ابو صالح : ومن قالك انها بتكون سيدة بيت ؟
ام صالح : انا اقول , انت متعرف طبيعة الجارات , كل وحده تنقهر من الثانيه وماتبي تش.....
ابو صالح : هاااااااه عاد !!!!! مارح تقول شي وانا بأدبها ان قالت شي .
ام صالح : بس بشرط !!!!!
ابو صالح باستحقار : وشو شرطه بعد ؟
ام صالح : ابي يكون لي دور ثاني مابي اشوفها .
ابو صالح قام : بعد بعد , مابقى غير تقولين اشترلي بيت ثاني , اقول ابتزوجها يعني ابتزوجها .
ام صالح : ومن هي الي ماتستحي على وجهها تاخذ واحد متزوج ؟
ابو صالح : اخت خويي .
ام صالح ضاق صدرها وحست ان السكوت الي له فترة ماجاء من فراغ !!! , ام صالح : طيب .

=============

بيوم الملكة تزوج ابو صالح وحده اسمها نوريه , شكلها فرق عن ام صالح , ام صالح
بدت فيها الشيخوخه لكن نوريه لسه ع الشباب القديم .
في الملكة ام صالح موجوده وبنتها وجنان في الحوش تلعب , ماهي مستوعب عالم
الجارة وعالم المناحر والكيد وكل سوالف الكبار , مو مستوعبه غير الامل والضحك
والخبال وخرابيط الطفولة .
تلعب مع علا لان امها صديقة ام صالح , علا : جنان انا ابي اروح اجيب تفاح تبين معي ؟
جنان : ايه وياريت تجيبين تفاحة حمره .
علا : طيب .
وتركتها .
جنان تتأمل مين الشخص الي بتستهبل معه في اللعب !!!! , توقفت عيونها على شخص
بعيد عنها وكان يلعب بالتراب , اتجهت له وقالت : لو سمحت انت ايش اسمك ؟
رفع راسه وقال : عاد وش تبين بأسمي !!!!؟
جنان : مافيها شي , نتعرف .
الولد : والله انا موفاضي للتعرف على البنات .
جنان : وليش ؟؟ مو انا وياك بشر !!!!!؟
الولد : الا بس انا مااصادق البنات .
جنان : وليييييش !!!!؟ على راسك ريشه !!!!!؟
الولد : لا بس انا ولد , ولد ,( وقرب لها واحولت عيونه ) تفهمين وش معنى ولد ؟
وتركها .
جنان : انا ياكرهلي للتمييز , عادي .
الولد التفت : بس انا محب النعومة .
جنان : والله لو انت منبوذ , كلنا خلق الله .
الولد التفت وتكتف : طيب , اسمي خالد ارتحتي !!!!
جنان اقتنعت : خااااااااااااالد !!!!! ومن امك وابوك ؟
خالد : ياشين الي بس يتشفى .
جنان : ايه مافيها شي .
خالد : انا عندي , فيها الشفايه الي مالها داعي .
جنان : خلووووووووووود , ياشينك قل من امك وابوك .
خالد : مارح اقول .
وتركها .
لحقته جنان ومسكت يده : خلوووووووووووووووووووووود .
خالد : انا لو رايح مع ابوي اصرف من اقابل بنت وضيفتها الكشف على اسماء
شجرة عائلتي .
جنان : خلودي عشاني مين امك وابوووووك ؟
خالد باستحقار : اروح ابرك .
وتركها وجت علا : جبت 3 تفاحات واحد لك والثانيه لي والث............
جنان سحبت الثالثه وركضت لخالد : خالد , هذه تفاحة !!!
خالد : وعشان وشو هالتفاحة !!!!؟
جنان : انا اسفه ع الشفايه .
ابتسم واخذ يدها بدل التفاحة !!!!!
تأملت لمعة التفاحة : لونها حلو .
جنان : ها !!! رضيت !!!!؟
خالد : طبعا !!!! تبين تلعبين معي تراب !!!!؟
جنان : احلى حلاوة .
وبدو يتصارعوا بالتراب ليت توصخت ثيابهم !!!!!! , جنان : انشالله اذا شفتك زعلان اواسيك .
خالد : وانشالله اذا شفتك زعلانه اسليك .
جنان : خلاص تصالحنا !!!!!؟
خالد : طبعا !!!!!
هم طفولة !!!! , وبدوا بالبناء وسيعملون لبنائه !!!!! , في ليلة مرعبه تحتوي على البدايه !!!!!
تصالحوا وسيتعهد كل من الاخر ان لايجعل للاخر ذرة حزن , انهم الطفولة !!!!

=============


3 
سكون الجو

الجزء 3



كل وحده تسلم ع العروس وطبعا كان العرس في البيت والحوش مليان بزارين
نوريه تسلم ع الحريم وتطالع الي يطالعها بطرف !!!!
الي يطالعها منال وكانت مستحقرة وجودها والحريم كل وحده تسولف مع الثانيه
والي تعلق والي تاكل فواكه ( الفواكه كانت ضيافتهم )
جنان : تعرفنا على بعض , ولقائنا بيوم العرس , شرايك بهاللقاء !!!!؟
خالد : مرة حلو , ماكنت متوقع ان بحياتي شي بيتغير للاحسن , جنان .
جنان : هلا .
خالد قرب : شفتي التفاحة الخربانه الي في الارض ؟
جنان : اي وش فيها ؟
خالد : تتوقعين ليش لونها بني ؟

جنان : مدري بس انت ليش تسئل عن الخربان ؟
خالد : جنون ليش متتحول التفاحة للونها الطبيعي ؟
جنان : مدري , بس هي خربانه , ليش نسئل عنها ؟
خالد : حياتي صرتي انتي فيها ...
جتهم هيا واستغربت وجود الاثنين الي موطبيعي !!!!! , اتجهت لهم , هيا : جنان .
جنان : نعم .
خالد : وش مقعدك مع الولد ؟
جنان : كنا نسولف ونحلم .
هيا : تحلمون !!!!! اقول جوالي العنيد ماشفتيه ؟
جنان : لا .
هيا تركتهم .
جنان : خالد هذه اختي هيا , اكبرنا متزوجة .
خالد : بس مو مبين ان لسانها طويل ؟
جنان : هي حازمة بس بس تبقى طيبه .
خالد : جنون , تدرين اني احلم ان يجينا مطر !!!!؟
جنان : وانا احلم اننا نركب حصان ونروح لبلاد العجايب الي فيها أليس .
خالد : لو جبنا عيال بعدين وش نسميهم ؟
جنان : انت لك العيال وانا لي البنات .
خالد : طيب بس وش نسميهم ؟
جنان : بناتي بسمي الاولى على اسم امي والثانيه بسميها مي والثالثه بسميهاااااا....
الا وش بتشتغل بعدين ؟
خالد : مدري بس احلم اصير طيار .
جنان : وانا احلم بالفن , بالرسم , اصير احسن رسامه بالدنيا .
خالد : اللللللللللللله حولي الليل والنخل والتراب الي يرد الروح لصاحبها , جنان
ليش مانشوف الامل ؟
جنان : مدري بس اتوقع حاله حال الهوى .
خالد : ليش مانسمي بنتنا امل ؟
جنان : لييييييييه ؟
خالد : عشان لما تضيق صدرونا نجيب بنتنا تونسنا .
جنان : حلوة الفكره !!!!
خالد : طيب شرايك نلعب الحين بالتراب !!!!!؟
جنان : يله .
وركضوا لأحلى موقع وطبعا مشاعر الفداء لجنان بدت تشتغل وعطت التراب الحلو
لخالد وهو بدى يجيب لها الماء .
وبدت الوناسه بينهم ومشاعر الحب الصغيرة تحلق حولهم والحياة حولهم في
البدايه وكأن مافي مشكله تنتظرهم او حتى ضيقة تجهز نفسها عشان تدخل
بقلوبهم .
جنان مستحيه من خالد وخالد يعبي لها التراب والبنت تستحي اكثر واكثر , موقعهم
مليان تراب , جنان : خالد .
خالد : هلا .
جنان : ودي اقول كلمة بس ..................
خالد : بس تستحي منها !!!!!؟
جنان بذهول : شعرفك !!!!!؟
خالد : حسيت فيك .
جنان : شرايك اقولها !!!؟
خالد : ايه .
جنان : اموووووت فيك .
خالد : وانا بعد ودي اصير طير عشان اشيلك واطير فيكي لوين ماتبين .
جنان : خالد .
خالد : هلا .
جنان : عطشان !!!!!؟
خالد : اي .
جنان : ابدور قارورة ماء واجيبها لك .
وركضت لوحده من الحريم وهزت قميصها , البنت : هلا .
جنان : ابي ماء .
البنت : ومن يبي ماء ؟
جنان : انا ابي اعطيه لواحد .
البنت تبي تشوف مين هالواحد , شافته وابتسمت له : انتي تعرفينه ؟
جنان بحياء : اي .
البنت مستغربه ليش استحت !!!!! , البنت : طيب بس ثواني واجيبلك .
دخلت تجيب ماء والتفتت وفي نفسها " ليش استحت لما طريت ولدي !!!!؟ " معقولة فهالسن
تبدى مشاعر الحب !!!!؟ "
اخذت من كرتون واتجهت لجنان , البنت نزلت مستوى البنت : هذه المويه وبالعافيه على قلبه .
جنان : امين .
طارت عيونها من ردة فعل جنان , في نفسها " شكي بمحله !!!!"
واقتربت الصورة لوجه ام خالد .
ركضت وتعبت لما وصلت وقالت بعد طول نفس : خلودي , هذه مويه .
خالد : اسف اذا تعبتك .
جنان : لا عادي , اطلب وش ماتبي وانا اجيبه لك .
ام خالد تراقبهم من بعيد ونادتها وحده من الحريم .

============


4 
سكون الجو

تكلمة الجزء 3



===========


دخل ابو صالح ومعه زوجته نوريه بكل هدوء وسكروا الباب وجلسوا ع السرير
المنخفض , ابو صالح لما قعد تأمل عيون نوريه الحاده !!!!
ابو صالح
" وين انا عن هالجمال !!!؟"
طلت جنان ع الحوش وشافت هيا + منال يسبون بالزوجة الجديده , مشت وجلست
عندهم , هيا انتبهت لوجود جنان وبكل حرة قلب قالت : انتي وش مسهرك بهالوقت ؟
جنان : يعني حرام اسهر !!!؟ اسمع سواليفكم .
منال : روحي انقلعي لغرفتك للحين اجيب المقلايه واضربها براسك .
جنان : كل مرة تمنعوني عن جلستكم , نفسي بس اعرف وش تسولفون فيه .
هيا : جنان لااقوم اجيب الساطور اقطع راسك روحي لغرفتك .
جنان : هيا منال ماصادقتوا احد بالزواج ؟
هيا + منال يطلعو بعض !!!!!
منال حبت تهدي وضع هيا : جنون روحي لغرفتك .
جنان :طيب .
وقامت وفكرت انها تتصل على علا خويتها , راحت للصاله ورفعت التلفون واتصلت عليها
ولحسن حظها هي الي عند التلفون .
جنان : اهلين علا .
علا جالسه ع بطنها : اهلين جنون , شعندك سهرانه بهالوقت ؟
جنان : تعالي , اليوم تعرفت على واحد وحبيته .
علا قامت وتعدلت : تعرفتي عليه !!!! شلون !!!!؟
جنان : تخيلي لقيته يلعب بالتراب لحاله وسبحان الله كأني شفت شي حلو فيه وحبيته .
علا : وعلمتي امك وابوك ؟
جنان : لا , بس بقول لمنال وهيا .
علا : والله ياجنان الي اعرفه عن الحب ان مدري ليه الكبار مايخلوننا نعرف عنه اي شي ,
ولا وكلامهم بالمدرسه لازم تحبون بعض , بس اسمع شي واشوف شي ثاني .
جنان : عاد لما تجي سالفه من الكبار اسئلهم عن الحب مدري ليه كل وحده تعطي للثانيه نظرة وكأنها
تقول مايخصكم , ابي اعرف ليه !!!!؟
علا : والله مدري بس الي فهمته من امي ان الحب له درجات , حب الخوات والاخوان وحب الام
والاب وحب الي يسمونه حب العشاق , عاد ياليت يصير حب العشاق منتشر بكل مكان والله كان المدرسات
مايصارخون علينا .
جنان : علا , شاريك اقول لأمي وابوي ؟
علا : انا اقول لا بالاول قولي لخواتك وبعدين قوليلهم بس الي اسمعه عن الحب ان مو كل
حب ينقال .
جنان استغربت : مو كل حب ينقال !!!! ليش ؟؟؟
علا : مدري , بنات خالاتي اسمع منهم قصص وشفت مرة ولد خالتي جايب لأختي هديه ساعة
ام قماش , ومين عاد الوسيط بينهم , انا !!!!! ههههههههه
جنان : شكلك ربحتي بهالمهمة .
علا : عطتني اختي 30 ريال وقالت لاتعلمين احد !!!!
جنان : ااااااااه ياليت منول وهيا يسون فيني كذا كان ربحت من كل وحده 60 .
علا : انا ياعمري يجيني بالاسبوع 150 ريال .
جنان : ها !!!! من مين ؟؟؟
علا : هذا غير العيال الي كل واحد يدفعلي مية على حساب اني مااعلم احد .
جنان : شكلك ماتخافين من عمانك .
علا : مررررررررررررة لو تصير مشكله بيخانقوني بس انا اسوي لهم مقلب جديد هاهاهاي .
جنان : اخخخخخ منك يامشاكسة لو خالد يدري فيك كان حطاكي مع شلته .
علا استغربت : من خالد !!!!؟
منال فتحت السماعة وسمعت جملة جنان !!! , جنان : خالد حبيبي الي بعرس ابوي .
تغير وجه منال وبعدها عصبت وسكرت السماعة , نزلت تحت ونادت جنان بصوت قوي : جنان !!!! ,
جنان !!!!!
طاحت السماعة من يد جنان !!!! , جنان : يمه !!!! شسالفه !!!!؟ علويه بعدين اكلمك .
وسكرت بوجهها واقبلت على منال , منال تخصرت : جنون مين خالد !!!!!؟
جنان بنية صافيه : منال , لايفوتك حبيت واحد اسمه خالد وهو طيوب وحبوب و....
واستقبلت كف خارق من يد منال !!!!! , جنان تغير وجهها من بعد الضربة !!!!! , جنان بهمس : ليش !!!!؟
منال نزلت مستواها : انتي مجنونة !!!!؟ من قالك تحبينه !!!!؟ ها !!!!! قولي !!!!
جنان : قلبي حب خالد , وخالد حبني .
منال : اششششش لحد يسمعك , لو يدري ابوي بهالكلام مع انه عايش جو مع المدام الي عنده
كان حرمك من كل قنوات الكرتون .
جنان خافت : ليش !!!!؟
منال : جنان انتي تحسبين ان الحب مثل الشكولاته !!!!!؟ الحب اذا سمعه ابوي منك بيقلب
ليلك نهار وبيجلدك جلد مو طبيعي .
جنان : مو انتي تحبين امي وابوي !!!!؟ وليش مااحب خالد !!!!؟
منال : جنون هالمواضيع مانقولها قدام امي وابوي , تحسبينه شي عادي !!!! ترى فيه دمار بيوت .
جنان خافت اكثر : ليش !!!!!؟
منال : جنان انتي وش تحسبينه لما تحبين ؟؟؟
جنان : الحب انك تشوفين دنيا حلوة , زود على حلاوة الطفولة نحس انا وخالد اننا مميزين عند البزارين ,
خالد يقول ان الحب يخلينا نبني مستقبل , نحسب حساب الي يضربنا ونسويله الف حل , لما نلعب مع
بعض مع شلة كل واحد مايترك الثاني , اذا بكيت خالد يجيبلي جالكسي من ثلاجة امه , وانا اذا شفته
زعلان اجيبله كوب نسكافيه , يجيب دروسه وخاصة مادة القواعد والعلوم , اشرحله كل شي , لما نروح
للبقاله كل واحد يشتري للثاني شي يحبه .
حست جنان بالنقاء الي موجود بقلب جنان !!!! , انصدمت من كل كلمة قالتها وحست ان بعض ضنها
مو كويس وحست انها غلطانه بحقها وبحق خالد !!!!! , قارنت بين الاحلام الورديه بالنسبة للبنات
والشباب وبين عشق الطفولة !!!!! طالعت وجه جنان الحزين وقالت : حبيبتي , انا مااقول شي عن
الولد الي حبيتيه بس حبيبتي المواضيع هذه ماتخصكم , انتم لكم حب خاص يالبزارين .
جنان : بس انا احبه واتمنى انه هو اخوي .
ابتسمت منال لتفكير جنان الي وين بالها ووين ثقافه جنان بالحب !!!! , تأملت حالها بهالدنيا كيف
ان الاطفال لهم تفكير نقي ونظيف ونيتهم ...... نيتهم كيف تستبعد عن النقد وعن الاتهامات وعن
الظنون السيئة !!!! , ابتسمت لتفكير اختها الصغير وحست انها بعيده بكوكب اخر منفصل عن
كاميرات البشر والصور والاعلانات الي تصدر لأي شخص اشاعة !!!!!
طالعت اختها وقالت : جنون ماتقولين لأي احد الا انا , فاهمه !!!!!
جنان : طيب .
التفتت وقالت : فرق بيننا وبينهم , بين عالمنا وعالمهم !!!!! يابختهم بس , ع الاقل نضمن ان
في حب مو احلام ورديه وبس .
واتجهت لغرفتها ودخلت ولقت جنان ترسم , ابتسمت وتذكرت جملتها
" نحس اننا مميزين عند البزارين !!!!, اذا بكيت خالد يجيبلي شكولاته , واذا بكى اسويله نسكافيه "
تنهدت واتجهت للسرير وانسدحت وللحين تسمع كلام اختها بقلبها !!!!!

===========

من بكره قرر ابو زيد يسوي لاخته عزيمة بمناسبة زواجها , هيا معصبه من حياة
امها ومنال تضيف الناس وكلما تقترب ضيافتها لزوجة ابوهم تتأفف بكل هدوء .
اما ام صالح فكانت تستقبل كل وحده وكل وحده تدخل وتسلم على ام صالح تلاحظ
على وجهها الاكتئاب .
اما بالنسبة للبريئ من كل الاحداث والقصص والمؤدي دور الامل والفرح والي توه
بمرحلة الطفولة والي ماعرف ولاشي من قوانين الحريم ولاتعرف على النذاله ولا
على الخيانه ولاتعرف على الحقد والنجاسة ولا على الظلم وحتى المشكله ميدري
ايش عالمها هي الطفلة جنان التي طلت من جدار ابيض !!!!
جنان بمفاجئة : صباح الخير !!!!!
خالد قام : صباح النور !!!!
اقبلوا لبعض !!!! , خالد : مارحتي تضيفين مع خواتك ؟
جنان : يوووووه كيفهم هم مدري ليه مكشرين وانا حبيت اتصبح على الابتسامه .
خالد : شاريك نلعب !!!!!؟
جنان : يله .
وتموا يركضون بمرح وبسعادة والصورة هادئة لما يركضون !!!!! , التفتت ام خالد وهي تطالع
الاثنين وكيف انهم بعيدين عن كل الناس .
جنان تشجع خالد على انه يجمع تراب وخالد فاطس ضحك على ضحك جنان المتسلسل !!!!
, استغربت هالنفسية عليهم بالرغم انهم اطفال !!!! , بس غريبة حركاتهم !!!! , غريبة ابتسامتهم !!!!
غريبة الي قاعدين يسوونه !!!!! , عيونهم التقاطات بريئة !!!!! .
جت وحده لأم خالد : شفيكي ؟
ام خالد : ولدي .
البنت : شفيه ؟
ام خالد : اول مرة اشوف بوجهه ملامح فرح ماقد شفتها بحياتي .
البنت طالعت بعيد , البنت : ولدك هذا طبيعي انك تلتقطين منه اي شي يفرح .
ام خالد : لا , من بعد طلاقي ماشفت بوجه ولدي نور يشع من وجهه , وكأنه اول مرة
يشوف سعاده بهالدنيا , ياخيتي انا تطلقت والولد مايدبي , وعمره ماشافني مع ابوه
اول مرة اشوف انه من جد مبسوط ومع البنت هذه الي معه , كأني ماقدمت شي
له رغم اني ماعمري قصرت معه بولا لعبه بس شسر الي اشوفه بولدي مع هالبنت !!!!! ,
البنت : انتي قاعده تتوهمين .
ام خالد : لا !!!!! , انا مو قاعده اتوهم انا اشوف شي غيري مايشوفه لاني ام والام تقدم
لعيالها اي شي لكن مع ولدي وبهالموقف ..... كأنه نسى الي قدمتله ولقى الي كان يبيه من
زمان .
خالد : جنان جنان , انتبهي لاتبللينه ترى الحين الهوى قوي واخاف يضره .
جنان : طيب حبيبي شسوي ؟
خالد : اصبري خلينا نروح مكان ثاني الهوى فيه خفيف .
جنان : لاحبيبي اصبر الهوى بعد شوي بيخف لان وقت صلاة الظهر قريب .
خالد : قصدك يعني الشمس بتطلع ؟
جنان : ايه اصبر شويه , خلينا نلعب انا وياك مصارعه ونشوف من الي بيغلب الثاني .
واليدين تمسكت ببعض وكل واحد يجر يد خصمه , خالد متحمس وعيونه على جنان الي
بيغمى عليها من قوة خالد !!!!! , جنان , حرام عليك .
خالد : لا مو حرام , ( وتم يعصر )
جنان : خلودي .
ام خالد تتأمل سعادة ولدها !!!!!! , وحريم العزيمة كل وحده تسولف مع الثانيه وكل وحده عينها
حاده ع الحريم !!!!!!
خالد فاز وضحك ضحكة حلوة وطاح بالارض وامه تتأمل حالته النفسيه الي اول مرة تشوفها
من بعد ماستوعب انه بدون اب .
خالد : جنان نلعب بالحوش !!!!!؟
جنان : يله .
وركضوا ركضه ام خالد تتأمل فيهم هالروح الغريبة على هالصباح !!!!! , وطلعوا من بين
النخل والصورة هادئة عليهم !!!!! , نور الشمس حلوة عليهم والوجوه سعيده وفي بشاشه
وابتدت سعادتهم من هاللحظة .

============

في الليل و ع السفرة كانوا الكل ياكلون العشى وكانت عيون منال على زوجة ابوهم
صاحبه العيون الحاده , منال كل شوي تطالعها وماسكة العصبية .
ام صالح وجهها ذبلان ومالها اي راي ولا قوة تخليها ماتشوف جارتها وكان اكلها يدوبه
وبالعكس اكلها الحين تحول لذل واهانه .
ابو صالح ياكل ولا همه مشاعر ام صالح وماركز الا على لقمة الرز , منال معصبة وودها
تسوي شي عشان تخلي امها مبسوطة .
بس مافي وسيلة ابد تساعد منال علشان ترتاح امها نفسيا وجنان مستغربه عصبية
اختها , فكرت انها توخر العصبية ومدت لها كوب : منول صبيلي ماء .
منال : طيب .
وصبت الماء وهي تطالع بزوجة ابوها بكل حقد !!!!! , نوريه : الحمد لله شبعت .
ابو صالح : وين يانوريه ماكليتي شي !!!
نوريه : الحمد لله يابو صالح الله يطول بعمرك ويخليلك لي ويخليلي لك .
ابو صالح : يابعد عمري انتي والله .
فكرت ام صالح تقوم وقالت : الحمد لله .
ابو صالح مطنش ولاهي مع لقمته !!!!!
ام صالح نزلت راسها !!!!!
منال عصبت !!!!!
جنان : شكلك يابابا تحب نوريه صح ؟
منال وجهت وجهها بعصبية لجنان !!!!!
نوريه ضمت جنان : يابعد عمري هو يحبني وبس !!!! الا يموووت ع الارض الي امشي عليها .
جنان : وبعد تحب امي يبه ؟
تغير وجه نوريه وطالعت ابو صالح !!!!!
ابو صالح : جنان يابنيتي روحي غسلي يدينتس .
جنان بفرح : ماقلتي يبه , تحب ماما مثل نوريه ؟
منال ابتسمت حست انها بردت بقلب امها !!!! , ابو صالح : روحي غسلي يدينتس .
جنان : طيب .
وقامت وهي تقول : ياربي وش فيه هالسؤال !!!!؟
وتركتهم

نوريه معصبة من لقافة جنان وحست ان لها دور في معاناتها فهالبيت !!!! , منال خذت بردت قلبها
بعد كلمة جنان وحست بفرح بعصبية نوريه .
دخلت جنان بمرح وقمزت للسرير وحطت يديها تحت راسها , دخلت منال وراحت لجنان
وضمت جنان بقوة : ياحبيلك ياخويتي صدق انك تهبلين ومافي مثلك اخت .
جنان مستغربه هالاخلاق : ليش وش سويت ؟
منال : شسويتي !!!!؟ سويتي شي كنت انا متضايقة منه وبردتي كبدي .
جنان : طيب وش الشي الي سويتيه عشان اعيده مرة ثانيه وتستانسين اكثر ؟
منال : مارح اقولك وابيك دايم تذكرين امي عند ابوي فاهمه ؟
جنان : طيب يعني تبيني امدح امي عند ابوي ؟
منال : ايه وابيك بعد تتغزلين فيها وخاصة قدام ابوي تفهمين ؟
جنان : يعني شلون اتغزل فيها ؟؟ اقول انتي تشبهين سندريلا ؟
منال : قولي اي شي بس اهم شي انك تتغزلين فيها وتمدحينها وتدخلين ابوي بالسالفه وخاصة لما يكون موجود
فاهمه ؟
جنان : طيب .
قامت منال وجنان متدري وش الي سوته عشان بس خلت منال تجي تضمها , نامت
وقامت بوقت الليل ولما ذاكت دروسها نزلت للحوش لقت نوريه وابو صالح جالسين
لوحدهم وقعدت عندهم .
جنان : تقهويتوا ؟
نوريه بدون نفس عشان حركتها بوقت الغدى !!!! : اي .
جنان : نوريه صبيلي قهوة .
نوريه صبت القهوة بس تبي تكبر بعين ابو صالح .
نوريه : يابو صالح .
ابو صالح : نعم .
نوريه : شرايك فيني !!!!!؟ ( وطالعت الدريشة الي تطل منها ام صالح )
ابو صالح : تهبلين قمر .
نوريه : الله يابو صالح يازين كلامك عني .
ابو صالح : اي حبيبتي توك شباب .
جنان : الا نوريه كم عمرك !!!!؟
نوريه : وليش تسئلين ؟
جنان : بس كذا .
نوريه : مو شغلك .
جنان : تكفييييييييين بشوف شكلك هو نفس عمرك ولا لا .
نوريه : يعني شلون ؟؟؟
جنان : ابوي يقول توك شباب , بشوف انتي نفس عمر اختي منال ولا لا .
نوريه حمقت عليها وحست ان هالحركة مو لله من جنان بس حست ان الي تسويه
جنان براءة منها مو نية سوده !!!! , نوريه : 45 .
جنان : يعني مو شباب اختي عمرها 23 وابوي قالي فوق ال30 كلهم شيبان .
تنهدت منال لما سمعت كل تفاصيل الحوار !!!!! .
ابو صالح مايقدر يقول شي عارف ان جنان بالوجه ترميها وعارف ان مو نيه شينة تقول
هالكلام .
نوريه : يعني انا حلوة ؟
جنان : ايه تهبلين وخاصة عيونك الي تقول عيون مرت ابو سندريلا .
نوريه : ومرت ابو سندريلا عيونها حلوة ؟
جنان : تسريحتها حلوة بس انا اخاف منها .
ام صالح مبسووووووووووووووووووووطة على حركات جنان !!!!
جنان : بشرتك بيضاء ومكياجك يهبل الا ممكن ألعب بمكياجك ؟
نوريه : اي حبيبتي بس لاتخربين شي .
جنان : شكرا يااحلى نوريه بهالدنيا .
وباستها بوسه قويه .
وانطلقت .
ابو صالح يضحك على حركات بنته .
دخلت غرفة نوريه وقمزت فوق السرير واخذت علبة المكياج وهي في عالم متدري
ان محظور عليها تلمس اي شي من غرفة الجارة .
بدت تخلط بالالوان وتحط بعيونها وترسم ومرة يطلع شكرها مهرج ومرة تقلد مكياج سندريلا
ومرة تتذكر شكانت تسوي اختها وتسوي مثلها .
كانت مبسوطة مع الالوان الي تشوفها ومع تزاحمها بالصندوق , تتأمل الالوان الخورافيه
من الذهبي والفضي وقالت : يهبل مكياجك يانوريه .
وبدت ترسم ومرة يخرع شكلها وكل مرة ترمش بعيونها تبين تثبت انها حلوة !!!!! ,
طفشت ورتبت الحوسه ودخلت غرفة منال , منال جتها وقعدت وقالت : جنون , وش شفتي بغرفة
نوريه !!!؟
جنان : ايه لايفوتك شفت ارواج تهبببببببببل وشفت اكسسوارات عندها وملابس تهبل
مدري من وين تجيبهم , امي فرق عن ملابسها هذيك كنها كوشة .
منال : اي وش بعد شفتي ؟؟؟؟
جنان : اي شفت روج ذهبي وروج عنابي و.....
منال : انا مابي الارواج , ماشفت ملابسها دولابها كذا .
جنان : اي شفت عندها ثياب كبييييييرة وعندها بعد صناديق مسكرات وعندها بعد ( وتفكر ) وش بعد !!!!
اي وعندها ترامس وعندها صحون يهبلن .
منال : وهذه وش تسوي بهالصحون ؟؟؟ ,,,, ياربي على الحياة .
جنان : وش حياتوه !!!!!؟
منال : لالا ولا شي يله قومي .
جنان : طيب .
وقامت جنان ونزلت تحت للحوش الا موجود فيه ابو زيد , طلعت نوريه من غرفتها
وهي لابسه عباة كتف وكانت متكشخة لاخر درجه , شافتها جنان وهي بالحوش
وقالت : نوريه , وين بتروحين ؟
نوريه : ووش تبين ؟
جنان : ابي اروح معك.
نوريه : ياربي على هاللقافة !!!! , روحي بس .
جنان يأست من نوريه وكملت اللعب .

============


5 
سكون الجو

الجزء 4


دخلت منال غرفة امها ولقت امها تصلي صلاة الليل , تأملتها واتجهت لها
وقعدت , منال : يمه .
ام صالح : هلا .
منال لاحظت الدموع بعيون امها !!! , منال : شفيك يالغاليه !!!!؟
ام صالح : ابكي على حالي يابنيتي .
منال نزلت راسها وبعدها قالت : انا متفاهمه مع وضعك بس ابوي عدل بينكم ,
انتي ليلة وهذيك ليلة , والفلوس انتي 200 وهذيك 200 يعني في شي ثاني
يصيحك غير هذولا ؟
ام صالح : يابنيتي , عدل بيننا بكل شي , لكن ياما شفت اشياء منه والحين اشوف
الوضع غير , ابوك كان يخانقني اطلع بوقت الدراسه , مايحب حركات الصحون
الي اقدمها له , لما نقعد على السفرة انا اشوف شي انتي وجنان ماتشوفونه ,
ماتشوفه غير الزوجة وبس , عمركم مارح تحسون فيني , وانتي يامنال مارح تحسين
بللي احس فيه الا اذا صار عندك سلايف .
منال : ليه وش دخل السلايف يمه !!!!؟
ام صالح : بنيتي , ماابي اخوفك بس مااقول الا الله يكتبلك كل خير مع رجلتس .
منال : الله يكتبلي الخير مع رجلي !!!! ليه بيصير شي !!!!؟
ام صالح : معذورة يايمه , زمان سلايف اول غير عن الحين , سلايف اول خوات والحين
كنهن جارات , بنيتي لاتتأثرين بكل وحده تحاول تقهرتس هذولا مايعرفن معنى الاصاله
, متربيات على المنافسة الي ماتجيب غير خراب البيوت .
منال : يمه لاتخوفيني الحين اروح لأبوي واقوله مابي المعرس .
ام صالح : لايبنيتي !!!! , حياة مع الرجال غير , لما يكرمتس ويحترمتس صدقينن
هالحريم مايجن على بالتس لو بيحسسنتس انتس بزله !!!! , ياما شفت من الحريم قبل
لااجيب صالح وهيا , شفت دواهي وتحملت لجل ابو صالح .
منال : ووش شفتي يمه ؟
ام صالح : يابنيتي مارح تفهمين الوضع , بس انشالله يطلع رجلتس حليل تهون
كل الامور , لان السلايف عفاريت اعوذ بلله منهن .
منال : اي بس اصابع يدينتس مهن سوى .
ام صالح : صادقه , ( ورفعت يدها تدعي ) يارب انت عالم بهالحال , عالم الصغيرة والكبيرة
وعالم بنية نوريه يارب انك ماتخلي نوريه تقترب مني وتجازي ابو زيد على الي سواه
لي , يارب !!!!! يارب انك تحمي بنياتي من كل مكروه ولاتقرب اي احد ناويلهن على شر .
منال شكت بموضوع حالتها !!!! , حست ان موضوع السلايف والجارة مو هين , صحيح
هي تعرف ان هالحال مو كويس بس متوقعت ان امها تعتبر هالموضوع كربة على قلب
الزوجة الاولى ,,, منال عقب تفكير قالت : يمه .
ام صالح : نعم .
منال : بغيت اقولتس ان في عزيمة يوم الاربعاء حقت ابو زيد , اخو نوريه .
ام صالح : الله لايوفقه هالخايس , يبي يحرني هالتسلب !!!!؟
منال : يمه خلي هالدعاوي بينك وبين نفسك مو وقته ابوي يسمع منك هالكلام والله بيحرمك
من المصروف .
ام صالح : الله يكتب الي فيه الخير بس .
منال : يمه انتي قلتي انا اشوف شي منال وجنان مايشوفونه , وشو ؟؟
ام صالح : لما تعرسين بتفهمين !!!!! بس الي قاهرن ليش عندها صحون بغرفتها ؟؟؟ وليش دايم تقلب
علي نفسيتي ولازم تخلينن اتكدر ولما طلعت ابو صالح ماعيا عليها مثلما كان يعيي علي .
منال : يمه بعض الاحيان جنان تبرد كبدك صح !!!!؟
ام صالح : جنان مالمست الربع عشان تبرده كله , يارب ياجبار اجبر خاطري .


==========


نوريه : يابو صالح انا محترمه مرتك ومالمست منها شي يجرح , بس بناتك منول وجنان
لازم توقفهن عند حدهن , والله احس جنان بعض المرات مستقصده انه تقهرني .
ابو صالح : يابنت الحلال تحطين عقلتس بعقل بزر !!!!؟
نوريه : هالبزر هذه انت شايف وش قالت اليوم الصبح .
ابو صالح : يانوريه ياحبيبتي ترى جنان طبعها كذا , انتي سمعتيها لما مدحتس ولا انا غلطان ؟؟؟
نوريه : لا منت غلطان صحيح انها مو قاصده كذا بس انا لي احترام وتقدير وجنان ماخلت
شي لي والظاهر الي دزتها علي بنيتك منال .
ابو صالح : يانوريه انتي وش بتس عليهم ؟؟
نوريه : وش فيني !!!!؟ كلما اجلس معك واخذ راحتي تجي وحده من هالثنيتن وتحر قلبي
, ياخي تعبت , ابي دور لحالي .
ابو صالح : وشوووو !!!!!؟ اقول خليك كذا احسن .
نوريه : اسمه يابو صالح عندك هالحل ولا ابروح بيت اخوي ياتوافق ولا البيت الحين .
ابو صالح : ووشو هالحل ؟؟؟
نوريه : انك تقعد مع منال وتفهمها اني انا لي تقدير واحترام ولي مكانه فهالبيت وتأدبها عن
تخطيطاتها مع جنان تفهم !!!!؟
ابو صالح : ابشري ولا طلبتي شي بس انتي هدي .
نوريه : وهالمنال خلت هدوء عندي !!!!!؟ وهيا الي كل ماتجي لازم تاخذك مني وتكركر معك طول
الوقت وانا ولاهميتك وكأني مو مرتك .
ابو صالح : يانوريه هذا بنيتي ولا ماتبيني اسولف معها ؟؟؟
نوريه : انا ماقلت ماتسولف بس مو تعلق عليها وكأني مو موجوده معك , الظاهر هيا ومنال
يبون لي الطره يابو صالح وانت ياغافليلك الله .
ابو صالح : لاااا هن مايسوون كذا بس انتي شكاكه وعشان كذا خفتي منهن , واذا تبين تطمنين اكثر
انا اروح انزلهن الحين بهالوقت واوقفهن عند حدهن .
تركها ابو زيد ولما راح تكتفت نوريه للانتصار الاول !!!!!
نزل ابوزيد وهو يصارخ : ام صالح !!!! منال !!!!!!
جت منال : سم يبه !!!!
ابو زيد اسمعي انتي وامتس !!!!
جت ام صالح : خير يابو صالح !!!!
ابو زيد : شيخوه !!!!! , اسمع مرتي تشتكي من حركاتكن قدامها , والله مانام عندتس الاسبوع الجاي تفهمين !!!!!؟
ام صالح في عالم !!!! , ام صالح مو مستوعب شخصية ابو صالح !!!!! , نزلت نوريه بقميصها
النوم الفاخر ورفعت حاجب !!!!!
ام صالح تطالعها بعيون الاجيال مارح تفسرها !!!!! , منال : يبه , حنا وش سوينا لنوريه !!!!!؟
ابو صالح : سكتي انتي انا مالي كلام معاك , انا لي كلام مع ام الشيلة ميمتس .
ابو صالح بكل عزيمة عربية : سمعي يابنت الناس , انتي كبيرة بالعمر وعلى ذمتي وبهالعمر
محد طالبتس حليلتن لوه , فخليتس راكده مع نوريه للحين اوريتس شي بحياتس مع شفتيه ,
نوريه يامنال تاج على روسكن , اسمع كلام من هنا ولا من هناك , وين ماكان !!!! , عاد ادري بكن يالحريم
تتفنن بالتشويه , والي ماعاجبة ضيفة البيت الباب يوسع جمل ياشيخه .
طلت جنان من جدار وتشاهد المشهد الاسري وبكل براءة بدت تحلل الي يصير قدامها !!!!!
ابو صالح يوجه كلامه لمنال : منال , انتي للحين ماصرتي على ذمة الرجال الي خطبتس ,

يعني باب دعوة الوالد جاهزة بأي وقت !!!!
منال امتلت عندها مشاعر غريبة !!!!! مشاعر كلها طفش وضيقة صدر وحدة حزن عنيفه !!!!!
ابو صالح : نوريه بتظل راعيه البيت وراعية على كل شي ولها الشور والامر لكن يالحريم ,
ولها الف حساب يامنال , مابي اسمع حتسي من برى بيتي ينقال عن نوريه , ولاابي حركات
مالها داعي وانتي عارفتن وش اقصد يامنال انتي وامتس .
ام صالح استسلمت للقدر الابدي : طيب يابو صالح , مثل ماتبي بتشوفوه .
وتركتهم بكل عفوية وهروب من الدنيا !!!!!
اما منال فكانت الدموع هي الوسيلة الي ممكن تسمح لها انها تعبر عن داخلها من قهر
وذل واهانه عظمى !!!!! , دخلت غرفتها ومشت وشافت جنان متغطية باللحاف بكل خوف
من صوت ابوها !!!!!
مشت وهي تفكر بكلام ابوها وبطلة نوريه الي وراها خلفية مسبقة !!!!
منال وقفت
" معقولة يازوجي المستقبل بتكون كذا !!!!!"
جلست منال وكلمات ابوها للحين تسمعه بقلبها مثل تهديد اليهودي !!!!! , للحين التأثير واضح
ملامح الشرود بوجهها !!!!! رفعت راسها للسماء وبعدها نزلت راسها : يارب !!!!!
قامت جنان من السرير وشافت حزن منال !!!!! , اتجهت لها بكل هدوء ونزلت مستواها ,
جنان : منال , ابوي ليش يهاوشك انتي وامي ؟
منال بالوجه : روحي انتي الثانيه لسريرك !!!!!
جنان خافت وطاحت بالارض !!!! , قامت : طيب .
وعدلت جنان نفسها وبدت تستقبل النوم بس استقبل تفكيرها المشهد الي لايمكن
ان تنساه !!!!! , مشهد الحوش !!!!! , لايمكن تغمض عينها وهي تتذكره !!!! , تتذكر
الكلمات الي سمعتها بالحوش !!!!! , تتذكر كل الملامح الي سجلتها عينها !!!!! تتذكر وقت المكان
والجو المخيف المرعب وكأنه فيلم مرعب !!!!! , تتذكر عيونها شكل زمن المشهد !!!!! ,
نامت بكل قوة واخيرا بعد موضوع التفكير جاها النوم .

=========

قامت الصبح وبدلت ملابسها ولبست ملابس المدرسة ونزلت تحت تفطر وكان فطورها ,
سندويشة جبن , افطرت والفطور عندها سم بسبب الجو الي عايشه فيه !!!!! ,
شالت شنطتها الثقيلة وراحت للمدرسة , بس قبل المدرسة تأملت المباني والعمارات الفخمة
وتأملت المطاعم الي اول مرة تشوفها بحياتها الطفولية !!! , تأملت السيارات الي قدامها وخلفها
ويمينها ويسارها .
تأملت مستوى السيارات , الي نازلة والي مرتفعه تأملت الرصيف الي يمشون عليه الناس
تأملت المنتزهات المسكرة وتأملت الحدايق المفتوحة وتأملت البحر الي يلمع وانتهت الصورة عند البحر !!!!
دخلت المدرسة وشافتها علا : جنان !!!! شلونك !!!؟
جنان بدون نفس : بخير .
علا نغير وجهها : شفيكي ؟؟؟
جنان : ابوي خانق امي .
علا قدامها : وليش خانقها !!!!؟
جنان : مدري , بس فطوري الصبح يلله بلعتوه .
علا : معليه ياجنونه , حتى انا ابوي وامي يتهاوشون .
جنان بعيون ناعمة : حتى انتي !!!!؟
علا : اي , بس انا اطنش والعب واذا تهاوشوا ابعد عنهم .
جنان : طيب , بس ابوي شكله يخوف لما هاوش امي .
علا : عادي لاتهتمين , الا وش صار بحبيبك خالد !!!!؟
جنان ابتسمت : مدري عنه , اكيد عنده دراسه مثلي , ترى يوم الاربعاء عندنا عزيمة ومدري ليه
احساسي يقول انك بتشوفينه !!!!
علا : ترى احاسيس الحب صدق .
جنان : انشالله صدق بس احس قلبي !!!!! , وناسه !!!!!!
علا : خلي قلبك هادي ولاتفكرين فيه كثير لانه رح يلهيك عن دراستك .
جنان : داريه بس اذا فكرت فيه استانس !!!!
علا : انا عارفه انك بتستانسين وبتقمزين فوق سريرك بس دراستك حتخليك كبيرة في عينه .
جنان : جد !!!!؟
علا : اي , هذا الي اسمعه من اختي لما تتكلم عن الحب .
جنان : طيب الحين خليننا نروح للفصل ونسولف .
علا : لاياعمري ممنوع ندخل الفصل , في عريفات !!!!
جنان : يووووووووووووه .
الصورة دائرية ع الساحة المدرسة وبوقت الطابور الصباحي , بدت الاستاذه تفتش عن
الاضافر وكل وحده خايفه من عيون الاستاذه الحاده !!!!
قربت من عند جنان : اشوف اضافرك !!!
جنان ورتها وابتسمت !!!!
الاستاذه : شاطرة حبيبتي , احلى اظافر من بين البنات انتي , ابيكي دايم تكونين نظيفه .
وتركتها .
جنان : اللللللللللله علا الاستاذه الشريرة مدحتني !!!!!
علا : اول مرة اشوفها مبتسمه !!!!
جنان من بعد اختفاء الاستاذه عنهم كلمت البنات الي بالطابور بهمس : بنات شفتوا ابتسامتها !!!!؟

=========


في وقت الحرارة !!!! , الشمس مضاد مركز على بيت ابو صالح !!!! , دخلت ام صالح
وبدت تجهز السلطة وبدت نفسيتها التعبانه من ذل واهانه بسبب شخصية نوريه
القوية عليها والي متقدر تسيطر عليها بسبب فارق الجسم بينها وبين نوريه , نوريه جلاد
في ساحة القصاص !!!!!
رن جوال نوريه بيبي الباندا وردت وعليها تسريحة الشلال وكان لون شعرها اصفر : الو .
ام زيد : هلا والله بنوريه , شلونك ووشلون ابو صالح ؟
نوريه : بخير الله يسلمك , الا شلون العيال ؟
ام زيد : كلهم بخير ,الا شلون تجهيزاتك بيوم الاربعاء ؟
نوريه : مسويه ذيك اللوك الي بعدها ابو صالح بيعاف ام صالح بالمرة !!!! بس اصبري علي
شوي .
ام زيد : انتي شكلك ناويه عليه نية !!!!
نوريه : هو مو ناويه نية , بس تقدرين تقولين احاول اخذ عقله بأي طريقة , يعني مابي عيشتي
مثل شيخوه , بس بحاول قد مااقدر اكسبه
منال تنصت بقوة خلف باب الصاله !!!!! , وبعد الانصات رفعت راسها وااااااااااه من القهر التي تسمعه
تشوف الظلم وساكت فيه .
مشت بالممر الي ارضيته عشب وبدت تفكر بحياتهم الاخيرة !!!! , لما تجي المشاكل والسبب
زوجة الاب تحس ان خلاص مالهم داعي بهالدنيا !!!!!
التفتت وشافت زوجة ابوها طالعه لفوق وهي تقول : اي ابي اروح للسوق عشان اشتري
شوية ثياب , الي عندي خلص تاريخهم ولازم اجدد , اي ياوخيتي , لازم السناعة يابنت الناس
ههههههههههه , تسلمين ياقلبي كلك ذوق , عاد انا شفت بالسوق موضات جديده
والظاهر نزلت بوقت زواجي من ابو صالح ......
واختفت سوالفها لما صعدت للدور الثاني , طبعا كل السوالف سمعتها منال وهي ميتة من
الاهانه لحياتها وحياة امها , عمرهم ماشافوا هالحركات , حركات السوق واللبس والسناعة
والكيد , ولا شافوا هالاشياء وكأنهم ماحسوا بالعيشة , زمن منفصلين عن زمن نوريه ,
من بعد اهانة ابوها لها ماعاد يفرق معها موضة ولا اي شي جديد بالسوق .
تمشت بالبيت وهي تتأمل كل جدار وكل التفاصيل الي موجوده فيه , بين النخل والتراب
والابواب القديمة وفرشة الحوش والارضية الي اغلبها اوراق الخريف , تأملت شكل السماء
ولونها !!!!! , تأملت وهي تتنفس الهوى الي له ريحة غريبة !!!!! غمضت عيونها بكل روحانيه
وبكل وله وغموض !!!!! .
من جهة ثانيه طفل يطالع البحر بكل تأمل ومغمض عيونه وفجأه يد سدت عيونه ,
خالد بيحاول يتعرف على اليد فلمسها برقة ,, خالد : امي !!!!!
ابتسمت ام خالد !!!, التفت خالد : مو تقولين بتطلعين ؟
ام خالد : هونت , بس انت بإيش تفكر فيه !!!!؟
خالد : افكر بجنان .
ام خالد : وانت تعرف وش اسم امها ؟
خالد : لا .
ام خالد : طيب انت تعتبر صديقه ؟
خالد : لا هي حبيبتي واعترفت لي .
ام خالد طارت عيونها من هالجرأه !!!! ,, ام خالد : طيب حبيبي الحين جاء وقت التسميع
في كم مادة مارجعتها معك .
خالد : يمه والله تعبت من المذاكرة اجليها لبعد العشى .
ام خالد : مالي شغل اليحن اسمعها لك , عندك كم حفظ سورة وابيات يله وبلا كسل .
خالد : يمه !!!!
ام خالد جلست بمستوى طوله : نعم .
خالد : يمه تتوقعين جنان تفكر فيني مثل مافكر فيها ؟
ام خالد : والله مدري بس خلك من الحب توك صغير .
خالد : اجل شلون جاني الحب !!!؟ الحب مايعرف عمر .
ام خالد : حبيبي خلودي ,, خلك من هالكلام الي ماينفع دراستك ,, تعال معي .
خالد يحاول يتفلت عن امه : يماااااااااا .
ام خالد : خلودي بلا خمول .
وتمت تجره وهو يحاول يتفلت منها .
رن جوال ام خالد : الو .
نوريه : السلام عليكم .
ام خالد : وعليكم السلام والرحمة ,, شلونك نوريه ؟
نوريه : بخير الله يسعدك ,, شلون العيال ؟
ام خالد : بخير بس تعرفين ايامهم الحين ,, اختبارات وحفظ .
نوريه : الله يوفقهم بس ... طلبت منك طلب واتمنى انك ماتردينه .
ام خالد : امري .
نوريه : في عندنا ببيت زوجي عزيمة وابيكي تحظرينها .
ام خالد : عزيمة !!!! ووش المناسبه ؟
نوريه : كذا ,, كرم من زوجي ,, يله تامرين على شي ؟
ام خالد : سلامتك .
نوريه بعزة نفس : مع السلامة .
ام خالد : فمان الله .
سكرت ام خالد بهدوء ,, خالد : يمه من الي متصل ؟
ام خالد : وحده من الحريم عازمتني ببيتها .
خالد : وفيه جنان ؟؟؟؟؟
ام خالد : مدري ,, تعال كمل .
وسحبته بقوة .

============



Powered by vBulletin® Copyright ©2000 - 2019, Jelsoft Enterprises Ltd.
Search Engine Optimization by vBSEO ©2011, Crawlability, Inc.
جميع الحقوق محفوظة لموقع ومنتديات الدولي ElDwly.com
جميع المواد المنشورة بمنتديات الدولي تُعبر عن وجهة نظر كاتبها فقط.